«Հեռուստատեսությունը տեղեկատվական հզոր միջոց է, իսկ տեղեկատվությունը միշտ հանդիսացել է իշխանությունների ամենակարևոր զենքերից մեկը, ուստի մենք այստեղ տեսնում ենք շատ լուրջ քաղաքական գործընթաց. ղազախները վաղուց արդեն պատրաստվում են ազատվել կայսերական լծից»,- «Առաջին լրատվական»-ի հետ զրույցում ընդգծեց կինոռեժիսոր, հասարակական գործիչ Տիգրան Խզմալյանը՝ անդրադառնալով Ղազախստանում ռուսական հեռուստաալիքների հեռարձակման հնարավոր փակման հարցին։
Հիշեցնենք, որ Ղազախստանում քննարկվում է ռուսական 4 հեռուստաալիքների փակման հարցը, քանի որ Ռուսաստանը փորձում է Ղազախստանում թանկացնել այդ հեռուստաալիքների հեռարձակման վճարը, ինչը հարուցել է Ղազախստանի իշխանությունների դժգոհությունը։ Նրանք հայտարարել են, որ հնարավոր է արդեն դեկտեմբերից այդ հեռուստաալիքներն այլևս չհեռարձակվեն իրենց երկրում։
Տիգրան Խզմալյանի կարծիքով՝ Հայաստանն այս առումով չի կարող համեմատվել Ղազախստանի հետ, քանի որ մեզ մոտ երբևիցե դրված չի եղել Ռուսաստանի՝ որպես պետական գերիշխանության, վերահսկողությունից ազատվելու խնդիր։
«Այնպես որ, մենք որպես ազգ կարող ենք հեռվից միայն ծափահարել ղազախների այդ որոշմանը և հարգել այն. դա սուվերեն պետության սուվերեն որոշում է, մեզ համար երանելի է նման բան»,- հավելեց Խզմալյանը։
Վերջինիս համոզմամբ՝ Հայաստանի հեռուստատեսությունն այժմ գրեթե ոչ մի բանով չի տարբերվում ռուսական հեռուստատեսությունից։
Նրա խոսքով՝ օր առաջ պետք է հասկանալ, որ վանել ռուսերենը գոնե հեռուստատեսությունից, դա ազգապահպանման, ազգային շահերի ամենակարևոր նպատակներից մեկն է։
«Դա այն է, առանց որի մենք չենք ստանա խոսքի ազատություն, որևէ բարեփոխում չենք կարողանա իրականացնել, որովհետև հեռուստատեսությունը մնում է իշխանության կարևորագույն լծակներից մեկը, և մինչև եթեր չմտնեն նոր մարդիկ, երիտասարդ սերունդը, ոչ մի փոփոխություն չի լինի. Սփյուռքի երիտասարդությունը պիտի գա, ընդ որում՝ ոչ թե դասական Սփյուռքի, այլ այն երիտասարդները, որոնք վերջին 20-30 տարում են հեռացել այստեղից և փայլուն կրթություն են ստացել Եվրոպայի կամ ԱՄՆ-ի լավագույն համալսարաններում: Նրանք այն պատրաստի զանգվածն են, որ օր առաջ պետք է բերվի Հայաստան, իսկ առանց դրա ոչ մի բարեփոխում չի ստացվի, և կրկնում եմ՝ լեզուն դրա առանցքն է, դրա բանալին է, իսկ հեռուստատեսությունը՝ ամենակարևոր լծակը»,- ասաց նա։
Մանրամասները՝ տեսանյութում։