Տնտեսվարողներն այսուհետ բնապահպանական և բնօգտագործման վճարների հաշվարկ-հաշվետվություններն էլեկտրոնային եղանակով կներկայացնեն միայն հարկային մարմնին: Նախկինում հարկ վճարողներն ստիպված էին թղթային եղանակով հաշվետվությունը սկզբից ներկայացնել լիազոր մարմին` բնապահպանական կամ ընդերքի տեսչություն, ստանալ գրանցում, որից հետո` ՊԵԿ: Այսուհետ կարիք կլինի petekamutner.am կայքի միջոցով նշյալ փաստաթուղթը ներկայացնել հարկային մարմին, որից հետո պետական մարմինները իրենք իրար միջև կփոխանակեն անհրաժեշտ տեղեկատվությունը: «Սա վերջին հաշվետվողական փաստաթուղթն է, որը թղթային եղանակով էր ներկայացվում: Բնապահպանական և բնօգտագործման վճարների հաշվարկ-հաշվետվություններն էլեկտրոնային եղանակով ներկայացումը համոզված ենք, որ կկրճատի փաստաթղթի ներկայացման ժամկետը, որը բիզնեսի համար շատ ավելի հարմար է լինելու»,-ասաց Պետեկամուտների կոմիտեի փոխնախագահ Վախթանգ Միրումյանը:
Այս փոփոխություններով` հարկային մարմնի կողմից էլեկտրոնային եղանակով ներկայացված հաշվետվությունն ընդունվելու դեպքում ինքնաշխատ եղանակով հարկ վճարողին ներկայացվում է հաշվարկ-հաշվետվության ստացումը հաստատող համապատասխան էլեկտրոնային ծանուցում: Հարկային մարմինը հաշվետվությունը ներկայացնելու օրվա հաջորդող մեկ աշխատանքային օրվա ընթացքում այն էլեկտրոնային եղանակով ներկայացնում է ՀՀ բնապահպանության նախարարություն, որը, ճշգրտման անհրաժեշտության դեպքում, եռօրյա ժամկետում այդ մասին գրավոր ծանուցում է վճարողին: