Սերժ Սարգսյանը Դիլիջանում համայնքի ղեկավարների առաջ ելույթ է ունեցել՝ հայտարարելով, որ ով չի ուզում նոքար լինել, թող գնա աղա դառնա, գնա ուրիշ գործի: «Եվ խնդրում եմ, որևէ մեկը Նոր տարուց հետո՝ լինի մարզպետ, լինի նախարար կամ ինձ մոտ մարդ, չմիջնորդի որևէ համայնքապետի ներելու համար այդպիսի դեպքերում»,- հայտարարել է Սերժ Սարգսյանը:
ԱԺ փոխնախագահ, ՀՀԿ խոսնակ Էդուարդ Շարմազանովը մեր հարցին, թե արդյոք այս հայտարարությունը նշանակո՞ւմ է, որ այլևս այլ խաղի կանոններ են գործելու, պատասխանեց. «Ոչ թե այլևս այլ խաղի կանոններ են գործելու, մշտապես մեր կառավարման շրջանում նախագահ Սարգսյանի ուշադրության կենտրոնում է եղել արդյունավետ կառավարման խնդիրը, համայնքներում համայնքապետերի իմիջի ինստիտուտի կայացումը: Խնդիրների առաջնահերթությունները և նրանց կիրառելիությունը փոխվել են»,- ասաց Էդուարդ Շարմազանովը:
Հարցին՝ արդյոք Սերժ Սարգսյանի հայտարարությունը հաղորդում չէ՞ հանցագործության մասին, Էդուարդ Շարմազանովն արձագանքեց. «Իհարկե, ոչ: ՏԻՄ-ի կայացման տարբեր փուլերում խնդիրների առաջնահերթությունները կարող են փոխվել: Կան խոշորացված համայնքներ, նոր մարտահրավերներ, և յուրաքանչյուր քաղաքական իշխանություն, այդ թվում՝ համայնքային իշխանություն, պետք է պատրաստ լինի դիմակայել և արձագանքել այդ մարտահրավերներին և տալ լուծումներ»:
Հարցազրույցն ամբողջությամբ՝ տեսանյութում: