Լուրեր
Կապիտալի արտահոսքի ավելացման պատճառներից մեկը բնակչության սարսափելի արտահոսքն է․ Ճզմաչյան
  • 13:10
  • 2017-12-11
  • Դիտումներ՝ *

Այս տարվա հոկտեմբերին կտրուկ ավելացել է Հայաստանից կապիտալի արտահոսքը: Մասնավոր փոխանցումների միջոցով ՀՀ-ից հոկտեմբերին դուրս է բերվել 115 մլն 706 հազար դոլար: Սա վերջին մի քանի տարվա մեջ ամենաբարձր ցուցանիշն է, ընդ որում, վերջին ամիսներին կապիտալի արտահոսքը գնալով ավելացել է:

«Առաջին լրատվական»-ի հետ զրույցում Հայաստանի բանկերի միության նախկին նախագահ, Եվրասիական համագործակցության ֆինանսաբանկային ասոցիացիայի տնօրենի տեղկալ, ՀՀ ներկայացուցչության տնօրեն Սամվել Ճզմաչյանը նշեց, որ ցուցանիշը մի քանի գործոնով է պայմանավորված, նախ, որ մեծ թվով քաղաքացիներ գտնվում են ՌԴ-ում, իսկ ՌԴ-ի նկատմամբ հզոր պատժամիջոցներ են կիրառվում, ուստի շատերը դժվարանում են, և Հայաստանից հարազատները գումար են ուղարկում, 2-րդ գործոնը, ըստ նրա, Ամանորին ընդառաջ ապրանքների ձեռքբերման համար փոխանցումներն են, ընդ որում՝ և՛ առևտրական կազմակերպությունները, և՛ ֆիզիկական անձինք, իսկ ամենակարևոր գործոնը նա համարում է բնակչության արտահոսքը։

«Հայաստան տրանսֆերտների մուտքը կազմել է 163 մլն դոլար, դա 20-20․5 տոկոսով ավելի է, քան անցած տարի։ Հայաստանից դուրս եկող մասնավոր տրանսֆերտները կազմել են 115․7 մլն դոլար, որը մոտ 50 տոկոսով ավելին է, քան անցյալ տարի էր, և 20 տոկոսով ավելին է, քան նախորդ ամիս, մոտավորապես 47․5 մլն դոլար տարբերություն է՝ պլյուսով ենք դուրս գալիս, կարող է զուտ ներհոսքը պակասել է, դա բացատրվում է տարբեր գործոններով։ Երբևէ չի եղել, որ Հայաստանը ավելի շատ կապիտալի արտահոսք ունենա, քան ներհոսք, ամենասարսափելի բանը, որ կարող է կատարվել, դա բնակչության արտահոսքն է։ Միանշանակ, ՀՀ ղեկավարությունը, այդ թվում՝ վարչապետը, նախագահը ամենամեծ մտահոգությունները ունեն այդ առումով, ինչպես կարելի դա դանդաղեցնել, մեղմացնել, ապահովել ներհոսք, իհարկե, տնտեսության զարգացմամբ, խորապես համոզված եմ՝ էդ քայլին է ձգտում այսօրվա կառավարությունը»,- շեշտեց նա։

Ճզմաչյանի խոսքերով՝ այս տարի և՛ արտասահմանից փոխանցումները ՀՀ, և՛ ՀՀ-ից փոխանցումները դեպի արտասահման ավելացել են, սակայն դեռևս չեն հասել 2013թ-ի ցուցանիշին։

«Գիտեք՝ ռեկորդային տարի էր։ Օրինակ, 2017 թ-ի հունվար-սեպտեմբեր ժամանակահատվածի համար Հայաստանի բանկային համակարգի միջոցով ֆիզիկական անձանց անունով ոչ կոմերցիոն նպատակներով փոխանցումները, զուտ ներհոսքը նախորդ տարվա համեմատ ավելացել է 8․6 տոկոսով՝ կազմելով 258 միլիարդից ավելի ՀՀ դրամ։ Զուտ կապիտալի արտահանում ես առանձնապես չեմ նկատում, արժեթղթերում ներդրումներն ավելացել են, դա նշանակում է՝ ներդրում կատարել են նաև տնտեսության մեջ, 2017-ի 3-րդ եռամսյակում նախորդ եռամսյակի հետ համեմատած ավելացել է 7․5 տոկոսով, դա պայմանավորված է նրանով, որ ավանդային տոկոսադրույքները կտրուկ նվազել են»,- ընդգծեց նա։

Մանրամասները՝ տեսանյութում։

  • Դիտումներ՝ *