Համայնքի ղեկավարների հետ հանդիպմանը ՀՀ նախագահ Սերժ Սարգսյանի ելույթը միտված էր նրան, որ նրանք ավելի ձգված աշխատեն: Ազգային ժողովում խորհրդարանական ճեպազրույցների շրջանակներում լրագրողների հետ հանդիպմանը նման կարծիք հայտնեց Ազգային ժողովի ՀՅԴ խմբակցությանղեկավար Արմեն Ռուստամյանը: «Նախագահի հորդորը՝ ուղղված համայնքի ղեկավարներին միտված է նրան, որ բոլորը պետք է ձգված աշխատեն; Սա այդ կոնտեքստում պետք է դիտարկել: Իսկ համայնքի ղեկավարների գործունեությունը վերահսկելու համար ստեղծված են կոնկրետ վերահսկողության մեխանիզմներ, նոր Սահմանադրությունն ավելի է դա ընդլայնելու: Շատ ավելի հստակեցվելու է տեղական ինքնակառավարման համակարգի գործունեությունը և համայնքապետների պատասխանատվությունը»,- նշեց Ռուստամյանը:
Նա հավելեց, որ իրենք էլ ահազանգեր ունեցել են, որ տարբեր համայնքներում տարբեր համայնքապետեր իրենց դիրքը չարաշահել են: «Դրա մասին բարձրաձայնելը կարծում եմ, որ շատ կարևոր նշանակություն ունի, որովհետև նրանք, ովքեր վերահսկում են համայնքի ղեկավարների աշխատանքը, իրենք նախ և առաջ պետք է փորձեն իրենց աշխատանքն անել, ոչ թե հովանավորեն կամ թաքցնեն նման դրսևորումները»,- ընդգծեց ՀՅԴ խմբակցության ղեկավարը: