Թուրքիայի նախագահ Ռեջեփ Թայիփ Էրդողանը Երուսաղեմն Իսրայելի մայրաքաղաք ճանաչելու ԱՄՆ նախագահ Դոնալդ Թրամփի որոշումն անվանել է հարված Մերձավոր Արևելքում խաղաղությանն ու կայունությանը։ Այս մասին, ինչպես փոխանցում է Anadolu գործակալությունը, Թուրքիայի նախագահը հայտնել է Սիվաս նահանգում՝ իշխող «Արդարություն և զարգացում» կուսակցության համագումարի ժամանակ։
Էրդողանի խոսքով՝ Թրամփի որոշումը ոչ մի նշանակություն չունի Անկարայի համար։ «Երուսաղեմն Իսրայելի մայրաքաղաք հայտարարելն ու ամերիկյան դեսպանությունն այդ քաղաք տեղափոխելն անիմաստ քայլ է Թուրքիայի աչքում»,-ասել է Էրդողանը։
«Մենք չենք թողնի Երուսաղեմը պետության քմահաճույքին, որի ձեռքերը կեղտոտված են երեխաների արյամբ։ Չենք թողնի քաղաքը երկրի խղճին, որի համար Երուսաղեմը որևէ սրբություն չունի, այլ հանդիսանում է պարզապես թալանի վայր։ Վճռական ջանքերը կշարունակվեն՝ համապատասխան իրավունքի և ժողովրդավարության նորմերի»,-հայտարարել է Էրդողանը։
Թուրքիայի նախագահը նշել է, դեկտեմբերի 13-ին Ստամբուլում Երուսաղեմի հարցով կայանալիք Իսլամական համագործակցության կազմակերպության արտահերթ գագաթնաժողովի ժամանակ ճանապարհային քարտեզ կընդունվի։
