ԱԺ-ում օրերս անդրադառնալով 2018 թ.-ի բյուջեի նախագծին՝ ԱԺ «Ելք» խմբակցության ղեկավար Նիկոլ Փաշինյանը, դիմելով քաղաքացիներին, ասել էր. «Դուք լավ չեք ապրելու, սա ձեր ընտրության արդյունքն է, վայելե՛ք»։ Նիկոլ Փաշինյանը ընդգծել էր՝ այս իշխանությանը, այս կուսակցությանը հարկավոր է, որ Հայաստանի Հանրապետության քաղաքացին 10 հազար դրամին «կակա» ասի, երկրում որևէ բան չի փոխվի, քանի դեռ քաղաքացիները 10 հազար դրամ ընտրակաշառք են վերցնում։
«Առաջին լրատվական»-ի հետ զրույցում ԱԺ «Ելք» խմբակցության քարտուղար Գևորգ Գորգիսյանը ասաց, որ Նիկոլ Փաշինյանի տեսակետը կիսում է, իրավիճակի պատասխանատվությունը կրում են նաև քաղաքացիները։ Ըստ նրա՝ չնայած նրան, որ «Ելք»-ի ընտրողները ևս վատ են ապրելու, բայց իրավիճակի պատասխանատվություն չեն կրում։
«Նրանք, ովքեր ընտրակաշառքով ընտրել են ՀՀԿ-ին, մեզանից պահանջում են ինչ-որ անիրականանալի բաներ: Այստեղ նաև արդարության պահ կա. երբ որ դուք մեզ պետք էիք, հարգելի քաղաքացիներ, գերադասեցիք ծախվել, և հիմա մենք ձեզ պետք ենք, մենք էլի ձեր կողքին կանգնած ենք, բայց գոնե խիստ քննադատական տոնով մի խոսեք մեզ հետ: Մենք անում ենք այն աշխատանքը, ինչի համար մեզ ձայն են տվել մեր ընտրողները»,- շեշտեց նա։
Գևորգ Գորգիսյանը ընդգծեց, որ իրենց բակի տղաների օգտին քվեարկելով՝ քվեարկել են ՀՀԿ-ի օգտին, որը այսպիսի ծրագրեր է բերում։
«Մեզ մոտ տարիներ շարունակ այն պոպուլիստական մոտեցումն է եղել, որ իշխանությունը տականք է, ամեն ինչ իրենց ձեռքերում է, ոչինչ հնարավոր չէ անել դեմն առնելու համար, և ժողովուրդը՝ քաղաքացին, մի կողմ է դրել երկրի համար պատասխանատու լինելու բեռը, որովհետև դա իրոք բեռ է, և ամեն քաղաքացի է պատասխանատու։ Բոլոր երկրները, որոնք զարգացել են, գնացել են երկու ճանապարհով՝ կա՛մ եղել է մի բռնապետ, որը որոշել է՝ այսուհետ պիտի զարգանանք, կա՛մ հասարակությունը էվոլյուցիոն ճանապարհով աճել է, ձևավորվել է քաղաքացի երկրի համար, ով իրեն պատասխանատու է զգացել և ամեն ինչ արել է, որպեսզի երկիրը զարգանա։ Մենք կարծում ենք, որ քաղաքացին պիտի լինի պահանջատեր, մենք ամեն ինչ անում ենք, որ քաղաքացին գիտակցի՝ ինքն է երկրի տերը»,- ընդգծեց նա։
Մանրամասները՝ տեսանյութում:
