Եվրամիության անդամ երկրների ֆինանսների նախարարները վերջերս հրապարակել էին 17 երկրների «սև ցանկը», որոնք հարկերից խուսափողների թաքստոցներ են համարվում: Այդ ցանկի երկրների մեծ մասում են գտնվում օֆշորային գոտիները:
Միջազգայնագետ Հովհաննես Իգիթյանը «Առաջին լրատվական»-ի հետ զրույցում ասաց, որ իրոք, Հայաստանում խնդիրներ կան այս մասով, պաշտոնյաները գնում են տներ, մեքենաներ և դրանց ծագման աղբյուրները պետք է հայտնի լինեն։ «Եթե դու ուզում ես պատշաճ կերպով հարաբերվել զարգացած երկրների հետ, որոնք մաքուր ցուցակում են, պետք է վերցնես նրանց ստանդարտները և քո համար իրավական հիմք դարձնես։ Եվրամիությունը ասում է՝ Հայաստան, եթե դու ուզում ես հարաբերվել ինձ հետ բարձր մակարդակով և ունենաս տնտեսական, ֆինանսական բոլոր դիվիդենտները, ապա պետք է գործես իմ խաղի կանոններով՝ լինես թափանցիկ, վճարես հարկերը պատշաճ ձևով։ Սա այն մոդելն է, որը ցանկացած զարգացած պետության նախադրյալն է»,- ասաց Իգիթյանը։
Իգիթյանը, անդրադառնալով ԵՄ-ի հետ կնքված համաձայնագրի իրագործմանը, նշեց, որ Հայաստանի իշխանությունների մոտ կամք, ցանկություն այդ համաձայնագիրը իրագործելու, կարծես թե, չի նկատվում։ Հայաստանի իշխանությունները իրենց գագաթնակետը համարում են ԵԱՏՄ-ն։ «Այն հանգամանքը, որ կառավարության ամենաբարձրաստիճան պաշտոնյան ասում է, որ ԵԱՏՄ-ն այլընտրանք չունի, նշանակում է, որ նրանք այլ ուղղությամբ չեն էլ աշխատում։ Կոռուպցիան Հայաստանում սկսվում է ամենաբարձր մակարդակում»,- նշեց Իգիթյանը՝ հավելելով, որ եթե մենք իրագործենք այն ամենը, ինչ ամրագրված է մեր Սահմանադրությամբ, ապա կտեսնենք, որ մենք որևէ կերպ չենք տեղավորվում ԵԱՏՄ-ի շրջանակներում։ «Եվ, և» չի կարող լինել։ Հնարավոր չէ լինել կիսաժողովրդավարական, կիսադիկտատորական։ Այսօրվա իշխանավորները հաղթանակած նշում են, որ իրենք իրագործել են «և, և», «կամ, կամ»-ը, առանց խորանալու, թե դա իրենից ինչ է ներկայացնում։ Մենք պետք է կրկնօրինակենք այն մեթոդները, գնանք այն ճանապարհով, որով գնացել են զարգացած երկրները։ Դա լրիվ հնարավոր է»,- նշեց Իգիթյանը։
Առավել մանրամասն՝ տեսանյութում։