Ազգային վիճակագրական ծառայության տվյալներով՝ Հայաստանում 2016 թվականին աղքատության մակարդակը կազմել է 29.4 %։ 2016 թ. աղքատների ընդհանուր թվաքանակը կազմել է մոտ 880 հազար մարդ, նրանցից շատ աղքատների թվաքանակը (ներառյալ՝ ծայրահեղ աղքատները) մոտ 295 հազար է եղել, իսկ ծայրահեղ աղքատների թվաքանակը՝ մոտ 54 հազար:
«Տնտեսական իրավունքի կենտրոն» ՀԿ նախագահ, տնտեսագետ Մովսես Արիստակեսյանը ԱՎԾ տվյալները համարում է քաղաքական պատվերով թվանկարչություն։ Նրա խոսքերով՝ իրենց հետազոտության համաձայն՝ Հայաստանում աղքատության մակարդակը 50 տոկոս է, եթե ոչ ավելին։
«Համահունչ է ԱՎԾ-ի կողմից հրապարակվող մյուս տնտեսական ցուցանիշների հետ, ես դա համեմատում եմ այսպիսի քաղաքականության հետ, եթե հիշենք՝ խորհրդային ժամանակահատվածում պոլիտբյուրոյի ներկայացուցիչները, որ խոսում էին ամեն բացասական բանի մասին, ասում էին, որ այդ բանը չկա Խորհրդային միությունում, օրինակ, Խորհրդային միությունում չկար սեքս, չկար մահացություն ու դա քաղաքական գաղափարախոսություն էր, և պետք է բացասական ոչինչ չլիներ։ ԱՎԾ-ն, ցավալիորեն վերածվել է այդպիսի մի քաղաքական գործիքի, որը պարտավորություն ունի ոչ թե հետևելու օրենքին՝ լինել անկախ, այլ մարմին, որն իշխանություններին հաճո նկարում է թվեր, այնպիսին, ինչպիսին պետք է։ Ասվածը բոլոր ցուցանիշներին է վերաբերում»։
Մովսես Արիստակեսյանի խոսքերով՝ աղքատության իրական մակարդակը այլ է, միայն մի քանի ցուցանիշները համադրելով կարելի ասել, որ նույնիսկ ԱՎԾ-ի տվյալներ հաշվողները նույնպես աղքատ են։
«Էս մեկ տարվա ընթացքում ԱՎԾ տվյալներով՝ ըստ սպառման տվյալների՝ նվազագույն պարենային զամբյուղը 50 հազարից բարձրացել է 60 հազարի, այսինքն՝ մարդուն պետք է 60 հազար, որպեսզի ինքը վերականգնի իր ֆիզիոլոգիական վիճակը, դե հիմա տեսնենք՝ ինչքան է նվազագույն աշխատավարձը՝ 55 հազար է, 3 տարի չի փոխվել, միջին աշխատավարձը 150 հազար է, իսկ արդյոք բավարար է, իսկ արդյոք բավարար է 60 հազարը, որպեսզի մարդը չլինի աղքատ՝ չհաշված ջրի, գազի, էլեկտրաէներգիայի ծախսերը»։
Ըստ նրա՝ բյուջեում սոցիալական ծախսերի կրճատումը նպաստում է աղքատության մակարդակի բարձրացմանը, փոխարենը ավելացնում են պետական ապարատի, նախագահի աշխատակազմի ծախսերը, բայց պետք է գոտիները ձգելու քաղաքականություն վարեն։
Մանրամասները՝ տեսանյութում։
