«Հետք» կայքը իրացման ցանցից նմուշառել էր 9 նմուշ հավ, հանձնել էր դրանք լաբորատոր փորձաքննության և 9-ից 5-ում հայտնաբերվել էին խնդիրներ։ Հաշվի առնելով այն հանգամանքը, որ փորձաքննություն իրականացրած լաբորատորիան հավատարմագրված լաբորատորիա էր, ինչպես նաև խախտումների բնույթն այնպիսին էր, որ այդ ապրանքները տեղափոխելուց կամ պահպանման պայմաններից չէին կարող այդպիսի վտանգներ ի հայտ գային, որովհետև հայտնաբերվել էին հակաբիոտիկների մնացորդներ և սալմոնելա, ապա մենք ուսումնասիրություններ արեցինք հենց մեկ օր անց՝ հասկանալու համար սխալ մակնշված և արդեն վտանգավոր ճանաչված մթերքները շարունակո՞ւմ են մնալ իրացման ցանցում, թե՞ ոչ։ Ցավալի է, բայց փաստ, որ այդ ապրանքները շարունակում էին մնալ շուկայում»,- «Առաջին լրատվական»-ի հետ զրույցում նշեց «Իրազեկ և պաշտպանված սպառող» ՀԿ նախագահ Բաբկեն Պիպոյանը։
Վերջինիս խոսքերով՝ այսօր ամբողջ աշխարհն է պայքարում հակաբիոտիկների դեմ․
«Եթե գյուղոլորտում չկան հասկացողներ, թե դա ինչ վտանգ է, ապա գոնե առողջապահության նախարարությունը պետք է գործադիր մարմնին բացատրեր, որ այսպես շարունակել չի կարելի, հասարակությունն ուղղակի մեղք է․ սալմոնելոզով հիվանդ մարդիկ, տեսեք, թե ինչ քանակություն են կազմում, իսկ մեծ մասն էլ արդեն չի դիմում բժիշկներին, որովհետև ինքնաբուժությամբ են զբաղվում, բայց լիազոր մարմնի անտարբերությունն այս պահին ուղղակի հանցագործություն է հիշեցնում»,- հավելեց նա։
Պիպոյանի տեղեկացմամբ՝ փորձաքննության ենթարկված ապրանքատեսակներից էին Հայաստան ներկրված ռուսական, ուկրաինական և բրազիլական ապրանքատեսակները, և խախտումներ էին հայտնաբերվել թե՛ ռուսականում, թե՛ բրազիլականում։
«Բրազիլական հավերի մեջ հակաբիոտիկների մնացորդներ տարբեր երկրների կողմից հայտնաբերվել են, բայց այդ ոնց է ստացվում, որ Հայաստանում դրանք չեն հայտնաբերվում, ես չգիտեմ․ որովհետև լիազոր մարմին չունենք, որովհետև կառավարությունը պետք է հասկանա, որ քաղաքական հովանավորությունը պետք է դադարեցնի, որովհետև յուրաքանչյուր նորմալ երկրում նման սկանդալներից հետո մի շարք անձինք ոչ միայն չէին շարունակի պաշտոնավարել, այլև չի բացառվում, որ քրեական գործեր հարուցված լինեին»,- ընդգծեց բանախոսը։