Արևելյան գործընկերության քաղաքացիական հասարակության ֆորումի Հայաստանի ազգային համակարգող, Երևանի մամուլի ակումբի նախագահ Բորիս Նավասարդյանի հետ «Առաջին լրատվական»-ը զրուցել է Հայաստան-ԵՄ խոր և համապարփակ շրջանակային համաձայնագրից հետո Արևելյան գործընկերության քաղաքացիական պլատֆորմի անելիքների մասին: Բորիս Նավասարդյանը նշել է, որ կան շատ կոնկրետ նախաձեռնություններ. առաջին հերթին մեծ ուշադրություն են դարձնելու համաձայնագրում նշված երկկողմանի՝ ԵՄ-Հայաստան քաղաքացիական հասարակության պլատֆորմի ձևավորմանը, ինչը լրացուցիչ ատյան է լինելու և ապահովելու է քաղհասարակության ներգրավվածությունը ամբողջ գործընթացի մեջ:
«Ձգտում ենք, որ այնտեղ ներկայացված և՛ ԵՄ-ի կողմից, և՛ Հայաստանի կողմից անդամները լինեն այն կազմակերպությունները, որոնք իրոք շահագրգռված են բարեփոխումներում, և պատրաստ են ակտիվ գործունեություն ծավալել բարեփոխումներն ապահովելու և համաձայնագրի բոլոր հանձնառությունները կատարելու համար»,- ասել է Բորիս Նավասարդյանը՝ հավելելով, որ դա հեշտ չի լինելու: Նրա խոսքերով՝ կան հստակ ձևակերպված առաջարկություններ, թե ինչպես պետք է պլատֆորմն աշխատի:
«Մեխանիզմները, որ մենք ենք առաջարկում այդ պլատֆորմի համար, մենք տեսնում ենք, որ այստեղ կա ֆորմալ մոտեցումների վտանգ: Եվ հաշվի առնելով եղած փորձը՝ պետք է հնարավորինս խուսափենք, որ այդ ֆորմալ գործառույթները հնարավորինս փոխարինվեն շատ կոնկրետ և պրակտիկ մեխանիզմներով»,- հավելել է նա:
Հարցազրույցն ամբողջությամբ՝ տեսանյութում: