«Ճակատի համալրման պրոցեսը շարունակվում է, մեզ լքողներ չկան»,-«Առաջին լրատվական»-ի հետ զրույցում ասաց «Հանուն Հայաստան պետության» ճակատի նախաձեռնող խմբի անդամ, ԱՍԱԼԱ-ի մարտիկ Ալեք Ենիգոմշյանը՝ ներկայացնելով ճակատի անելիքներն այս փուլում։
Այժմ բավականին ակտիվ գործողությունների ծրագիր է մշակել Զարուհի Փոստանջյանը և համազգային ընդվզման կոչ է անում։ Ալեք Ենիգոմշյանից հետաքրքրվեցինք՝ արդյո՞ք տեսնում են նաև Փոստանջյանի հետ համագործակցության հնարավորություն. «Անկեղծ ասած՝ Զարուհի Փոստանջյանի հետ հատուկ հաղորդակցություն չկա։ Ինչպես գիտեք՝ իրեն էլ էր կոչ արվել միանալ այս ճակատին և նա իր դիրքորոշումը հայտնել է։ Բոլոր ուժերի մեկտեղումը դեռևս մնում է ցանկալի, բայց այս պահի դրությամբ իր հետ հատուկ հաղորդակցություն չկա»։
Ալեք Ենիգոմշյանը հավելում է՝ անցած տասնամյակի ընթացքում քաղաքական և հանրային գործունեությամբ Փոստանջյանն իր կարևորությունը դրսևորել է և բնական է, որ իրենք ցանկություն ունեն նրա հետ համագործակցել. «Բայց դա չի նշանակում միայն իր հետ, այլ նաև Զարուհի Փոստանջյանին է վերաբերվում այդ ցանկությունը։ Մինչ այս պահը չի ստացվել, բայց ես վերստին կոչ եմ անում՝ մենք բոլորով պետք է համախմբենք մեր ուժերը։ Բաց ենք եղել և շարունակում ենք բաց լինել՝ անհրաժեշտ է ուժերի համախմբում, այդ համախմբումն է, որ մեզ կհասցնի ցանկալի արդյունքի»։
Հարցազրույցն ամբողջությամբ՝ տեսանյութում։
