«Ղազախստանում կա ինքնիշխանության զգացողություն. այնտեղ հալած յուղի տեղ չեն ընդունում ամեն ինչը, ինչպես որ մեզ մոտ հիմնականում անում են, ու Ղազախստանի նման արձագանքը հարգարժան դիրքորոշում է»,- «Առաջին լրատվական»-ի հետ զրույցում նշեց հասարակական գործիչ Դավիթ Սանասարյանը։
Հիշեցնենք, որ Ղազախստանում քննարկվում է ռուսական 4 հեռուստաալիքների փակման հարցը, քանի որ Ռուսաստանը փորձում է Ղազախստանում թանկացնել այդ հեռուստաալիքների հեռարձակման վճարը, ինչը հարուցել է Ղազախստանի իշխանությունների դժգոհությունը։ Նրանք հայտարարել են, որ հնարավոր է արդեն դեկտեմբերից այդ հեռուստաալիքներն այլևս չհեռարձակվեն իրենց երկրում։
Դավիթ Սանասարյանի խոսքով՝ շատ ցանկալի կլիներ, որ նման մոտեցում տարբեր հարցերի վերաբերյալ Հայաստանում ևս կարողանային ցուցաբերել։
«Ես կասկածում եմ, որ այս իշխանությունների օրոք ռուսական ալիքների նկատմամբ նման բան արվի, սակայն դա անհրաժեշտություն է։ Մեր սերունդները ինֆորմացվում են հիմնականում ռուսական լրատվամիջոցներից ու այդ քարոզչության ազդեցության տակ են հիմնականում։ Այն, որ մեզ մոտ էլ են ռուսական ալիքներ այդքան նայում, դա նրանից է, որ սեփական հեռուստաալիքներն ուղղակիորեն ձախողել են. այնպես չի, որ ռուսականը չի ձախողում, բայց այդ թյուր պատկերացումը, որ ռուսական ալիքներ նայելով մարդիկ դուրս են գալիս Հայաստանի սահմաններից և նայում են ավելի նորմալ լրատվականներ, նայում են ավելի լավ հաղորդումներ, դա մի օր կպայթի»,-ընդգծեց բանախոսն ու այս համատեքստում հավելեց. «Ինչ վերաբերում է մեզ մոտ այդ ալիքները փակելուն, ապա շեշտում եմ, որ այդքան ողնաշար է պետք ունենալ այդ հարցը սեղանին դնելու համար»։
Մանրամասները՝ տեսանյութում։