65 տարում Թուրքիայի նախագահի առաջին այցը Հունաստան սկսվել է Թուրքիայի նախագահ Ռեջեփ Թայիփ Էրդողանի և նրան ընդունած Հունաստաի նախագահ Պրոկոպիս Պավլոպուլոսի միջև կտրուկ հայտարարությունների փոխանակմամբ, հայտնում է BBC-ն։
Էրդողանը հայտարարել է, որ 1923 թվականի պայմանագիրը, որը սահման է հաստատել Թուրքիայի և Հունաստանի միջև Առաջին համաշխարհային պատերազմից հետո, կիրառվում է անարդար կերպով։ Պավլոպուլոսը մերժել է ցանկացած հնարավոր փոփոխությունները Լոզանի պայմանագրում։
Թուրքիան և Հունաստանը 1950-ականներից ՆԱՏՕ-ի կազմում են, սակայն նրանց երկկողմ հարաբերությունները մնում են լարված։ Այդ լարվածության պատճառները բազմազան են՝ Էգեյան ծովի անմարդաբնակ կղզիների պատկանելիությունը, կիպրական հարցը և այլն։
Թուրքական կառավարությունը նաև դժգոհ է Հունաստանի Գերագույն դատարանի որոշումից, որով արգելափակվել էր 8 թուրք զինվորականների արտահանձնումը։ Նրանք իբրև թե մասնակցել են անցած տարի Թուրքիայում տեղի ունեցած հեղաշրջման անհաջող փորձին։
Հունաստանն իր հերթին գանգատվում է, որ Թուրքիան պարբերաբար խախտում է իր օդային և ռազմածովային տարածքը։
Հարևանների միջև լարված հարաբերությունները պահպանվում են XIX դարի 30-ականներից, երբ Հունաստանը հասել է Օսմանյան կայսրությունից անկախության։
Էրդողանը հայտարարել է, որ Հունաստանում մուսուլմանների հանդեպ վերաբերմունքը վկայում է այն մասին, ոո Աթենքը չի պահպանում պայմանագիրը։ Էրդողանը կարծում է, որ պայմանագրի որոշ կետեր պարզաբանման կարիք ունեն։
Ավելի ուշ Հունաստանի վարչապետ Ալեքսիս Ցիպրասն ասել է, որ երկու երկրները պայմանավորվել են ընդունել վստահության ամրապնդման միջոցառումներ՝ հավելելով, որ կողմերի համար կարևոր է սովորել՝ քննարկելու իրենց հայացքներում առկա տարբերությունները հանգիստ ձևով։