Սերժ Սարգսյանը քարտ-բլանշ է տվել Վիգեն Սարգսյանին ռեֆորմներ անելու հարցում

«Ռեֆորմները, հատկապես ՊՆ-ում կատարվող ռեֆորմները, առանց բարձրաստիճան պաշտոնյաների ազատումների, անհնար է»,- «Առաջին լրատվական»-ի հետ զրույցում ասաց ռազմական փորձագետ Վովա Վարդանովը։ «Հայկազն էլ այն գեներալներից է, որ թերացել է իր պարտականություններում, կամ ավելի ճիշտ՝ ժամանակ չի գտել պարտականություններով զբաղվել, նախարարն էլ լինելով այդ կառույցի ռեֆորմատոր, ստիպված է եղել ազատվել ավելորդ բեռից։ Դա շատ օրինաչափ է»,- հավելեց Վարդանովը։

Նշենք, որ այսօր պաշտպանության նախարար Վիգեն Սարգսյանը հաստատեց Գլխավոր շտաբի պետի տեղակալ Հայկազ Բաղմանյանի ազատման լուրը։ Նախարարի խոսքերով՝ Բաղմանյանն իր հորդորով աշխատանքից ազատվելու զեկուցագիր է ներկայացրել: Հարցին, թե ո՞րն է եղել նման հորդորի պատճառը, Սարգսյանը պատասխանել է. «Աշխատանքային պայմանավորվածությունների չկատարում, ծառայության անհամատեղելիություն»:

Վարդանովի խոսքերով՝ հավանաբար, Բաղմանյանն իր ներկայությամբ, գործողություններով խոչընդոտում էր համակարգում կատարվող բարեփոխումներին։ «Ես մի բան գիտեմ, պաշտպանության նախարարը, քանի դեռ զինվորական էր, դժվար էր, ավելի ճիշտ՝ անհնար էր բանակում ռեֆորմներ անել։ Իսկ նոր նախարարը անում է։ Դա մենք տեսնում ենք իր նշանակումից անմիջապես հետո։ Նա դեռ շատ բան ունի անելու, իսկ Բաղմանյանին հեռացնելը այդ ճանապարհին կատարվող քայլ էր։ Բոլորից միանգամից ազատվելը ճիշտ չի լինի, դրա համար էլ առանձին-առանձին է հանում։ Գեներալների հեռացնելը դրական քայլ է, նրանք 100 տարվա մեթոդներով են կառուցում բանակը։ Փոփոխության անհրաժեշտություն սրանից շատ առաջ էր պետք»,- նշեց Վարդանովը։

Մեր դիտարկմանը, թե Բաղմանյանի հեռացումը եղել է Վիգեն Սարգսյանի, թե՞ Սերժ Սարգսյանի որոշումը, Վարդանովը պատասխանեց. «Ռազմական կառույցը, ըստ օրենքի, ենթարկվում է Գերագույն գլխավոր հրամանատարին։ Այս դեպքում Սերժ Սարգսյանին, մյուս պարագաներում, որտեղ Գերագույն գլխավոր հրամանատարին չի ենթարկվում բանակը, այդ երկրներում միշտ հեղաշրջման փորձեր են լինում։ Այլ հարց է, թե ինչքան լավը, կամ վատն է Սերժը։ Եթե Սերժ Սարգսյանը լինելով Գերագույն գլխավոր հրամանատար, Վիգեն Սարգսյանին նշանակել է պաշտպանության նախարարի պաշտոնին, նշանակում է, որ ինչ-որ ներքին պայմանավորվածություններ կան։ Ես կարծում եմ, որ Սերժ Սարգսյանը քարտ-բլանշ է տվել Վիգեն Սարգսյանին ռեֆորմներ անելու հարցում։ Ռեֆորմները ՊՆ-ում անհրաժեշտություն են։ Դա ապացուցեց Ապրիլյան պատերազմը»,- նշեց Վարդանովը։

Բանակի խնդիրներով զբաղվող, իրավապաշտպան Ժաննա Ալեքսանյանն էլ մեզ հետ զրույցում անդրադառնալով Բաղմանյանի պաշտոնանկությանը, նկատեց, որ Վիգեն Սարգսյանի պատճառաբանությունն առնվազն զավեշտալի է, քանի որ եթե Բաղմանյանին ազատում են իր թերացումների համար, թող հանրությանը տեղեկացնեն, թե որտեղ է թերացել նա։ «Հայկազ Բաղմանյանը երկար տարիներ մշտապես ուղեկցել է Սերժ Սարգսյանին, նրա մերձավոր շրջապատից է։ Նա տարիներ շարունակ բիզնես գործունեություն է ծավալել, հարստացել, մամուլում մշտապես չարաշահումների, կրիմինալի հետ նրա առնչությունների մասին գրվել է, խոսվել է, բայց նա անձեռնմխելի է մնացել։ Հիմա, թե ինչ է պատահել, չեմ կարող ասել։ Եթե Վիգեն Սարգսյանը փորձում է դիվիդենտներ հավաքել և ցույց տալ, որ մեծ ձկանը ազատել է, ապա մենք այդքան միամիտ չենք, որ դա միանշանակ ընդունենք։ Պարզ է, որ Բազմանյանի ազատումը քաղաքական որոշում է, և նրան ազատել են քաղաքական դրդապատճառներով։ Թերացումների մասին խոսակցությունները զավեշտալի են»,- նշեց տիկին Ալեքսանյանը։

Իրավապաշտպանի խոսքերով՝ Բաղմանյանի ազատումը միանշանակ Սերժ Սարգսյանի որոշումն է, որի պատճառները խորքային են և ավելի ուշ հայտնի կդառնան։