«Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքի նախագծին «Ծառուկյան» խմբակցության պատգամավորները քվեարկելու են ազատ՝ ով ինչպես կկամենա։
Այդ մասին «Առաջին լրատվական»-ի հետ զրույցում ասաց «Ծառուկյան» խմբակցության պատգամավոր Լուիզա Սարգսյանը։ Նա ընդգծեց, որ օրինագծի ընդունմանը և կիրառմանը կողմ է։
«Հիմա փոփոխությունները կատարվել են, և բազմաթիվ պատգամավորների ու հասարակության կարծիքը հաշվի է առնվել, և կարծում եմ, որ այս փոփոխությունների ներքո հանրությունն էլ, հանրության այն հատվածն էլ, որը շատ վատ, ինչ-որ սրերի վրա էր ընդունում, պետք է կարողանան հասկանալ, որ սա այն ճակատագրերի, այն մարդկանց պետք է օգնի, որոնք հասել են ծայրահեղության»,- շեշտեց նա։
Լուիզա Սարգսյանի խոսքերով՝ օրենքը չի դառնալու ընտանիքների համերաշխության չափման միավոր, ավանդական ընտանիքները խաթարելու խնդիր էլ չկա։
«Մենք չունենք ավանդական ընտանիք կոչված ձևակերպումը, որպեսզի մի օրենսգրքում կարդանք և ասենք՝ այ սա է ավանդական ընտանիք ձևակերպումը, բայց ես բնավ չեմ կարծում, որ ավանդական ընտանիքը դա բռնություն է, ծեծ է, ջարդ է, երեխաների խեղաթյուրված ճակատագրեր է»,- ընդգծեց նա։
Մանրամասները՝ տեսանյութում