Ֆրանսիայի նախագահ Էմանուել Մակրոնն ԱՄՆ նախագահ Դոնալդ Թրամփի հետ հեռախոսազրույցի ընթացքում անհանգստություն է արտահայտել՝ կապված այն բանի հետ, որ Սպիտակ տան ղեկավարը կարող է ընդունել որոշում Իսրայելում ԱՄՆ դեսպանատունը Թել Ավիվից Երուսաղեմ տեղափոխելու մասին՝ իսրայելական և պաղեստինյան պատվիրակությունների միջև բանակցությունների նախօրեին։ Այս մասին ասվում է ԱՄՆ-ում Ֆրանսիայի դեսպանատան հաղորդագրությունում։
«Պարոն Մակրոնը կրկին ընդգծել է, որ Երուսաղեմի կարգավիճակի հարցը պետք է լուծվի իսրայելցիների և պաղեստինցիների միջև խաղաղ բանակցությունների շրջանակում, որոնց նպատակը պետք է լինի Իսրայելի և Պաղեստինի խաղաղ և անվտանգ գոյակցում հաստատելը Երուսաղեմով՝ որպես մայրաքաղաք»,-ասվում է հաղորդագրությունում։
Սպիտակ տան ներկայացուցիչների խոսքով՝ Դոնալդ Թրամփը դեռևս որոշում չի ընդունել դեսպանության տեղափոխման հարցով, ինչը կնշանակի Երուսաղեմի պաշտոնական ճանաչում որպես Իսրայելի մայրաքաղաք։ Այդ դեպքում ԱՄՆ-ը կդառնա աշխարհում առաջին երկիրը, որը կգնա նման քայլի։
Ամերիկյան դեսպանության տեղափոխման հարցով արտահայտվել է նաև Թուրքիայի նախագահ Ռեջեփ Թայիփ Էրդողանը։ «Պարո՛ն Թրամփ, Երուսաղեմը մուսուլմանների համար թույլատելիի սահմանն է»,-ասել է Էրդողանը հեռուստատեսային ուղերձում։ «Մենք կարող ենք (դեսպանության տեղափոխման դեպքում) խզել դիվանագիտական հարաբերություններն Իսրայելի հետ»,-ասել է Թուրքիայի նախագահը։
