BBC-ի թուրքական հաղորդումների բաժնի համաձայն՝ 2006-2016 ժամանակաշրջանում աշխարհում մամուլի և խոսքի ազատությունը ամենից շատ ոտնահարվել է Թուրքիայում: Այս մասին հայտնել է BBC Türkçe-ը՝ հիմնվելով մարդու իրավունքների հարցերով զբաղվող Article 19 և V-Dem հասարակական-քաղաքական կառույցների կատարած հետազոտության արդյունքների վրա:
Նշյալ հետազոտությունը կատարված է 172 երկրներում՝ իշխանամետ լրատվամիջոցների, օրենքի խախտումների, համացանցի սահմանափակումների, արդարադատության, լրագրողների նկատմամբ գործադրվող ճնշումների, հասարակական խավերի և սեռերի միջև անհավասարության ու նման այլ ոլորտների ուսումնասիրությամբ:
Այդ ուսումնասիրության հիման վրա կազմված զեկույցի հեղինակները մտահոգություն են հայտնել Թուրքիայում Էրդողանին քննադատողների դեմ ուղղված մեղադրանքների և սպառնալիքների կապակցությամբ: «Ընդդիմադիրները պնդում են, որ 2017-ի ապրիլին Թուրքիայում բանտարկված 152 լրագրող կար: Անցյալ տարվա հեղաշրջման փորձից հետո ընդհանուր առմամբ փակված է ավելի քան 170 լրատվամիջոց, այդ թվում՝ թերթեր, առցանց թերթեր, հեռուստակայաններ և լրատվական գործակալություններ: Պաշտոնազրկված է 2500 լրագրող»,- ասված է զեկույցում:
Թուրքական ընդդիմադիր Cumhuriyet թերթի թղթակից Այտըն Էնկին BBC Türkçe-ի հետ զրույցում նշել է, որ Թուրքիայում այլևս չի մնացել որևէ լրատվամիջոց, որը կարելի լինի գրաքննության ենթարկել:
«Հայտնի է, որ ամբողջ աշխարհում կառավարությունները, մեծ կազմակերպությունները, բանկերը փորձում են գնել լրագրողներին։ Սակայն իշխանության «Արդարություն և զարգացում» կուսակցությունը ավելի խելացի վարվեց և լրագրողների փոխարեն՝ գնեց թերթերն ու հեռուստակայանները»,- ասել է նա:
Հավելենք, որ ըստ զեկույցի՝ 2006-2016 ժամանակաշրջանում խոսքի ազատության ոտնահարումները սաստկացել են նաև Բրազիլիայում, Եգիպտոսում, Լեհաստանում, Վենեսուելայում և Բանգլադեշում: