Հանրապետության նախագահ, Զինված ուժերի գերագույն գլխավոր հրամանատար Սերժ Սարգսյանը հայկական երկու հանրապետությունների փոխգործակցության շրջանակում երեկ աշխատանքային այցով ժամանել է Արցախի Հանրապետություն:
Նախագահ Սարգսյանը Արցախի նախագահ Բակո Սահակյանի հետ այցելել է Պաշտպանության բանակի շտաբ, որտեղ տեղի է ունեցել ավանդաբար անցկացվող տարեվերջյան խորհրդակցությունը՝ ՀՀ և ԱՀ պաշտպանության նախարարների և բարձրաստիճան հրամկազմի ներկայացուցիչների մասնակցությամբ: Պաշտոնական այս տեղեկատվությունն ավելի քիչ է բացահայտում Սերժ Սարգսյանի այցի բովանդակությունը, քան` նրա այցը լուսաբանող լուսանկարները` զինվորական հանդերձանքով: Բանն այն է, որ զինվորական կեցվածքը, որպես կանոն, որոշակի բովանդակություն է հաղորդում Սերժ Սարգսյանի՝ Արցախ կատարած այցերին: Արտաքին նման ֆոնով Սերժ Սարգսյանը որոշակի դրամատիզմ, ինտրիգ է հաղորդում իր այցերին, ընդ որում` դրանք ունենում են բազմաշերտ, բազմահարթակ նշանակություն:
ԼՂ խնդրի կարգավորման գործընթացի համատեքստում Սերժ Սարգսյանը տարին եզրափակում է բավականին տպավորիչ վերջաբանով` ապահովելով ԵՄ անդամ 28 և ՀԱՊԿ անդամ 6 երկրների դիրքորոշումների փաստաթղթային ներդաշնակությունը պաշտոնական Երևանի տեսակետների հետ և, Ադրբեջանին, ըստ էության, մղելով լուսանցք` լեգիտիմության դաշտից դուրս դնելով անգամ Բաքվի՝ պատերազմ սանձազերծելու մտադրությունը: Մյուս կողմից` այն, ինչը Երևանը համարում է դիվանագիտական հաղթանակ` ընդամենը միտված է ստատուս-քվոյի պահպանմանը, ինչը չի երաշխավորում հակամարտության բարենպաստ կարգավորումը բովանդակային հարթության վրա: Պատահական չէ, որ Սերժ Սարգսյանը պարբերաբար ակնարկում է ցավոտ լուծումների մասին, ինչը Արցախում միանշանակ ընկալման չի արժանանում:
Սարգսյանն այս առումով բավականին բարդ երկընտրանքի առջև է կանգնած, որովհետև պետք է կարողանա համադրել միջազգային համատեքստը և այն տրամադրությունները, որ կա մեր հասարակության, զինվորականության շրջանում, մանավանդ, որ Ադրբեջանը շարունակում է հոգեմաշ պատերազմը` պարբերաբար երիտասարդ կյանքեր խլելով առաջնագծում:
Սերժ Սարգսյանի երեկվա այցն ուշագրավ է, սակայն նաև բանակային կառավարման համատեքստում, որովհետև երեկ, կարծես, պաշտոնապես հաստատում գտան լուրերը, որ ԶՈւ Գլխավոր շտաբի պետի տեղակալի պաշտոնից ազատվում է Հայկազ Բաղմանյանը: Սա նշանային իրադարձություն է ոչ միայն բանակի, այլ նույնիսկ հայաստանյան համակարգի համար, որովհետև Բաղմանյանն օդիոզ կերպար է և մարմնավորում է բանակի վերնախավի ու քրեաօլիգարխիայի սերտաճումը: Մյուս կողմից` անհատական կադրային լուծումների հետևանքները սահմանափակ են, երբ համակարգը շարունակում է գործել նույն տրամաբանությամբ, չկան նոր արժեքային համակարգ, իդեաներ: Ի վերջո, նույն Հայկազ Բաղմանյանը հենց այն համատեքստի ծնունդ է, որը շարունակում է գոյություն ունենալ:
Եվ վերջապես, Սերժ Սարգսյանի երեկվա այցը կարող է ունենալ ներքաղաքական համատեքստ` առնվազն այն հարթության վրա, որ հերթական անգամ արձանագրվում է, թե Սերժ Սարգսյանը պաշտպանության և անվտանգության հարցերում, ըստ էության, չունի այլընտրանք: Սերժ Սարգսյանը դիվանագիտական հաջողություններ է արձանագրել եվրոպական և ռուսական ուղղություններում, որը, ըստ էության, նշանակում է, որ նրա 2018-ի իշխանության հայտը, մեծ հաշվով, լոյալ վերաբերմունքի է արժանացել է թե՛ Բրյուսելում և թե՛ Մոսկվայում: Հիմա եկել է ներքաղաքական դաշտում Սերժ Սարգսյանի վճռական գրոհի կամ «օպերացիա-2018»-ի մեկնարկի պահը, որի խորհրդանշական մեկնակետն Արցախն է` այն գործոնը, որն ամենից շատն է լեգիտիմացնում Սերժ Սարգսյանի իշխանական նոր հայտը: