«Հայռուսգազարդի» մամուլի հետ կապերի պատասխանատու Շուշան Սարդարյանը հայաստանյան գործակալություններից մեկի հետ հեռախոսազրույցում չի բացառել, որ «Հայռուսգազարդ»-ը կարող է լինել Հյուսիս-հարավ գազամուղի՝ Վրաստանի տարածքով անցնող հատվածի գնորդը։ «Կարծում ենք, Վրաստանը բավական թափանցիկ կանցկացնի այդ մրցույթը։ Մենք կուսումնասիրենք, և եթե համարենք, որ գործարքը ունի տնտեսական ռեզոն և տրամաբանություն, չի բացառվում, որ մենք ևս մասնակցենք»,- ասել է Շ. Սարդարյանը։
Հարցին ի պատասխան, թե՝ արդյո՞ք Ադրբեջանի կամ այլ ընկերության կողմից գազատարի ձեռքբերումը չի վտանգի Հայաստանի գազամատակարարումը, Շ. Սարդարյանն ասաց, որ որևէ վտանգ չի տեսնում, քանի որ գազամատակարարումը կարգավորվում է իրավապայմանագրային հիմքով, և բոլոր հարցերը լուծվում են այդ դաշտում։