Թուրքիայի նախագահ Ռեջեփ Թայիփ Էրդողանը հերքել է օֆշորային մեղադրանքները, որոնք իր հասցեին հնչեցրել է ընդդիմության առաջնորդ, Ժողովրդա-հանրապետական կուսակցության ղեկավար Քեմալ Քըլըչդարօղլուն։
«Նա ասել է, որ արտերկրում՝ ինչ-որ ընկերություններում, ես միլիոնավոր դոլարներ ունեմ՝ թափահարելով ինչ-որ թղթեր, որոնք անվանել է բանկային հաշիվներ, և չի ցուցադրել այդ թղթերը լրագրողներին ու դատախազներին։ Թե դրանք ինչ թղթեր են, գիտի միայն Քըլըչդարօղլուն և նրանք, ովքեր դրանք տվել են նրան։ Ժամանակին նա բոլորին ասել էր, որ ես հաշիվներ ունեմ Շվեյցարիայում։ Երբ ես պահանջեցի ապացույցներ ներկայացնել, նա չկարողացավ դրանք ներկայացնել՝ հերթական անգամ խայտառակվելով։ Այս անգամ էլ պատմությունը կրկնվել է։ Ապացուցի՛ր, որ ես գումաներ ունեմ արտերկրում, և ես հրաժարական կտամ, ընդմիշտ կհեռանամ քաղաքականությունից»,-նշել է Էրդողանը։
Էրդողանը կարծում է, որ Քըլըչդարօղլուն խնդիր է դարձել նաև սեփական կուսակցության համար։ Թուրքիայի նախագահը կարծում է, որ Քըլըչդարօղլուն պետք է անձամբ հեռանա քաղաքականությունից։ «Այս երկիրը հոգնել է նման զրպարտիչ-քաղաքական գործիչներից։ Երբ նրան խնդրում ես ապացույց ներկայացնել, նա սկսում է հնարամտել կամ հաստատում է, որ չի հիշում ասվածի մասին»,-հայտարարել է Էրդողանը։
Էրդողանը նաև հիշեցրել է Քըլըչդարօղլուի աղմկալի հայտարարության մասին՝ Թուրքիայի նախագահի նոր նստավայրի շինարարության հետ կապված։ «Քըլըչդարօղլուն ողջ երկրով մեկ հայտարարել էր, որ նստավայրում տեղադրված են ոսկե զուգարանակոնքեր։ Նա ստել է, մենք ապացուցել ենք դա, սակայն նա հարկ չհամարեց ներողություն խնդրել։ Ինչպե՞ս կարելի էր այդպես անխղճաբար ստել ոսկե զուգարանակոնքերի մասին։ Եթե զուգարան գնալու կարիք ունես, ապա ես քեզ կհրավիրեմ պալատ, և դու կհամոզվես, թե այստեղ քանի ոսկե զուգարանակոնք կա»,-ասել է Էրդողանը։