Պակիստանի իշխանությունները ձերբակալել են 10 մարդու՝ երիտասարդ զույգին «պատվի համար սպանելու» պատճառով։ Զույգն ամուսնացել էր՝ չստանալով հարազատներից թույլտվություն, ինչը պահանջվում է՝ համապատասխան ավանդական ցեղային ծեսերի։
Ողբերգությունը տեղի է ունեցել Կարաչի քաղաքում։ «Պատվի սպանության» զոհերն են դարձել 24-ամյա Աբդուլ Հադին և 19-ամյա Հասինա Բիբին, ովքեր ամուսնություն էին կնքել նոյեմբերի սկզբին, հայտնում է Independent-ը։
Դանակի վնասվածքներով երիտասարդների մարմինները հայտնաբերվել էին տեղի գերեզմանատներից մեկում։ Աղջկա հայրը դեռևս թաքնվում է իրավապահներից։
Բոլոր ձերբակալվածներն արդեն խոստովանել են իրենց մեղքը՝ հայտնելով, որ սպանությունը կատարվել է տեղի ցեղային խորհրդի որոշմամբ։
Որոշ տվյալներով՝ ամեն տարի Պակիստանում հարազատների կողմից իրականացվող «պատվի սպանությունների» զոհն է դառնում մոտ 1000 կին։
