ՀՀ կրթության և գիտության նախարար Լևոն Մկրտչյանը կարևորում է սոցիալապես անապահով ընտանիքների երեխաների համար բարձրագույն կրթություն ստանալու ավելի լայն հնարավորություններ ընձեռելու հարցը: Ազգային ժողովում «Մասնագիտական կրթության և ուսուցման ոլորտում ընթացող բարեփոխումներն ու օրենսդրական հիմնախնդիրները» թեմայով խորհրդարանական լսումների ընթացքում նախարարը պատասխանեց ԱԺ փոխխոսնակ Միքայել Մելքումյանի դիտարկմանը, թե պետությունը պետք է այնպես անի, որպեսզի չունևոր ընտանիքների երեխաների համար էլ արժանապատիվ կրթական ծառայություններից օգտվելու հնարավորություններ լինեն: Նախարարն ընդգծեց, որ այդ ուղղությամբ էլ աշխատանքներ տարվում են: «Մենք հիմա փորձում ենք այնպես անել, որ Եվրամիությունից ստացվող կրթական դրամաշնորհները մեկ ուղղությամբ չբաշխվեն, այլ ուղղվեն ամեն մարզում անհրաժեշտ կրթական ծրագրերի իրականացմանը»,- նշեց նախարարը:
Լևոն Մկրտչյանը նշեց, որ միջին մասնագիտական կրթության համակարգում անվճար կրթությունը կարողանում են լավ հիմքի վրա պահել, բայց բարձրագույն կրթության համակարգում պետությունը միայն 15-20 տոկոսով է անվճար կրթություն ապահովում, մնացածը մնում է ուսանողների վրա: «Մենք ունենք աղքատության ցուցանիշ և ուսումնասիրություններ ենք արել ու պարզել, որ չունևորների միայն 7 տոկոսն է բարձրագույն կրթության համակարգում: Բայց սովորաբար լուրջ գիտնականները հենց այդ շերտից են գալիս, ուստի մենք նրանց պետք է կրթության հնարավորություն տանք»,- մանրամասնեց նախարարը:
Նա ընդգծեց, որ հիմա, երբ «Զինվորական ծառայության և զինծառայողի կարգավիճակի մասին» օրենքով առանձնանում են զինվորական ծառայությունից տարկետումն ու անվճար կրթությունը, կարող են փոփոխություններ անել: «Մենք կարող ենք հասկանալ, թե ինչ մասնագիտության կարիք ունենք: Եթե ունենք ֆիզիկոսի կարիք, կարող ենք այս դաշտում ուսումնառության 70 տոկոսն անվճար դարձնել, ինչը կբերի բարձրագույն կրթության մատչելիության կտրուկ աճի, որն այսօր չկա մեր հասարակության 25-30 տոկոսի համար»,- մանրամասնեց նախարարը:
ԱԺ փոխնախագահ Միքայել Մելքումյանը նշեց, որ Հայաստանին անհրաժեշտ են մասնագիտություններ, որոնք համահունչ կլինեն երկրի տնտեսության զարգացմանը: Նա նկատեց, որ հարկավոր է հասկանալ, թե տնտեսության որ ճյուղերն են առաջիկա տարիներին առաջնահերթ լինելու, և կրթության ոլորտում շեշտը դնել հենց այդ ոլորտների համար որակյալ մասնագետներ պատրաստելու վրա: