Տաջիկստանում ոստիկաններին արգելվել է ավելորդ քաշ ունենալ։ Երկրի ՆԳ նախարար, գեներալ Ռամազոն Ռահիմզոդա Համրոն հայտնել է, որ վերջին 6 ամսում իրավապահ մարմիններում աշխատանքը կորցրել է 20 մարդ, ովքեր չեն կարողացել կարճ ժամանակում կորցնել ավելորդ քաշը։ Սակայն որոշ աշխատակիցներ կարողացել են իրենց պատշաճ տեսքի բերել նախազգուշացում ստանալուց հետո։ 7 անձիք վերականգնվել են պաշտոններում՝ նիհարելուց հետո։ Դեռևս հունվարին նախարարը հայտարարել էր, որ երբ ոստիկանը սկսում է գիրանալ, նրա աշխատունակությունը նվազում է։ «Մեր աշխատակիցների քաշը պետք է համապատասխանի տարիքի և հասակի հարաբերակցության միջազգային աղյուսակին»,-այդ ժամանակ նշել էր նախարարը։
Երկրում արգելքները ոստիկանների քաշով չեն սահմանափակվում, այլ տարածվում են ուսումնական հաստատություններում Ամանորի, Հելոուինի տոնակատարությունների, ինչպես նաև տարեդարձը, դպրոցն ավարտելը, հարսանիքը հրապարակավ ճոխ նշելու վրա։ Խոսքը վերաբերում է նաև հուղարկավորություններին։