«Այս երեք երկրների մերձեցման պատճառներից առաջինն աշխարհաքաղաքական էր, այսինքն, որ երեքն էլ միաժամանակ Արևմուտքի հետ դիմակայության մեջ են գտնվում, իսկ սիրիական ճգնաժամի պարագայում այս երեք երկրներն էլ փորձեցին միասնական մոտեցումներ ձևակերպել, ինչն աննախադեպ էր, փոխարենը հնարավորություն չտալով արտաքին այլ դերակատարներին հայտ ներկայացնել նման մեծ դերակատարման համար»,- «Առաջին լրատվական»-ի հետ զրույցում ընդգծեց թուրքագետ Լևոն Հովսեփյանը` անդրադառնալով սիրիական ճգնաժամի կարգավորման շուրջ նոյեմբերի 22-ին Սոչիում տեղի ունեցած Ռուսաստանի, Թուրքիայի և Իրանի նախագահների եռակողմ հանդիպմանը:
Այս ամենով հանդերձ, սակայն, թուրքագետը չի կարծում, որ Թուրքիա-ՌԴ-Իրան եռակողմ համագործակցությունը հետագայում էլ այսպես հանդարտ և առանց լուրջ տարաձայնությունների կարող է շարունակվել:
«Հիմա սիրիական հիմնախնդիրը մի նոր փուլի եզրագծին է և այս նոր փուլը կարող է կրկին ի ցույց բերել նոր հակասություններ և մրցակցություն, որովհետև այլ մի բան է փորձել ապահովել կայունություն, բայց լրիվ այլ բան է հետճգնաժամային պատերազմական փուլում ապահովել ազդեցության մեխանիզմներ: Այս առումով կարծում եմ, որ հակասություններն այս երեք երկրների միջև սրվելու են, քանի որ նրանք փորձելու են ավելի առարկայական հնարավորություններ ապահովել իրենց համար»,-շեշտեց Հովսեփյանը:
Մանրամասները` տեսանյութում: