Երեկ Լոս Անջելեսում կայացավ «Հայաստան» համահայկական հիմնադրամի ամենամյա հեռուստամարաթոնը, որի ընթացքում արձանագրվեց 12.505.456 մլն ԱՄՆ դոլարի նվիրատվություն և նվիրատվության խոստում։ Այս անգամ գումարն ուղղվելու է Արցախի տարածքում խորքային հորերի հորատման և նոր ոռոգման ցանցի կառուցմանը, ինչպես նաև արևային էներգետիկ կայանների տեղակայմանը։
Արցախի Հանրապետության նախագահի խորհրդական Արթուր Աղաբեկյանը «Առաջին լրատվական»-ի հետ զրույցում անդրադառնալով հարցին, թե ինչու է տարեցտարի նվազում նվիրատվության չափը, ինչու է Սփյուռքն անտարբեր, արձագանքեց. «Եթե նայենք մասնակիցների թիվը, կտեսնենք, որ անտարբերության մասին խոսելը շատ սխալ կլինի: Ես կարծում եմ՝ «Հայաստան» հիմնադրամի նախաձեռնություններին մասնակցելն ավելի կարևոր է, քան այն փողը, որ հավաքագրվում է, որովհետև երբեք գումարը չի բավարարելու լուծելու այն ռազմավարական խնդիրները, որ որդեգրել են Արցախի իշխանությունները և Արցախի ժողովուրդը: Որքան մեծ լինի մասնակիցների թիվը, որքան այդ մասնակիցները հետաքրքրված լինեն Արցախում տեղի ունեցող իրադարձություններով, Արցախում լուծվող խնդիրներով, հավատացած եմ, որ այդ մասնակցությունը բերելու է այնպիսի մասնակցության, որ այդ գումարները, հիմա չափի մեջ շատ են, թե քիչ, վաղը լինելու են անընդհատ, և հայ ժողովուրդն ամբողջական մասնակցություն է ունենալու Արցախի խնդիրների լուծմանը, որովհետև Արցախի խնդիրները ո՛չ մեկ օրում են լուծվելու, ո՛չ երկու օրում»,- ասաց Արթուր Աղաբեկյանը:
Նա նշեց, որ մի քանի տարի ինքն էլ մասնակցություն է ունեցել մարաթոնի քարոզչական աշխատանքներին և հաճախ է լսել արտահայտություններ, թե ինչու այդ խնդիրներն Արցախի բյուջեով չեն լուծվում, ինչու պետությունը իր խնդիրը չի համարում. «Վստահ եմ, որ ժողովուրդը գիտակցել և հասկանում է, որ Արցախի 150.000 բնակչությունը Արցախի 12.000 քառ. կմ տարածքի վրա չի կարողանա լուծել բոլոր խնդիրները, և մասնակցության թիվը ցույց է տալիս, որ մեր ժողովուրդը գիտակցաբար գնում է ստանձնելու ամբողջ պատասխանատվությունը Արցախում ռազմավարական խնդիրների լուծման համար»:
Հարցին՝ ինչո՞ւ չկա այնպիսի վստահություն, որ աշխարհում 10 միլիոն հայերի գոնե 10 տոկոսը տարեկան մեկ անգամ իրեն պարտավորված զգա Արցախի առաջ, Արթուր Աղաբեկյանը դժվարացավ պատասխանել. «Դուք այդ հարցով արդեն իրական պատասխան եք տալիս շատ հարցերի: Իհարկե, մեր ակնկալիքն է, որ մեր ժողովուրդը իր մասնակցությամբ ցույց տա իր հետևողականությունը, թող մեր խոսակցությունը կոչի նման լինի, թող իրականում յուրաքանչյուրս գիտակցենք, որ գումարի չափը կարևոր չէ, մարդը կարող է ընդհանրապես գումար չտալ, կարող է մեկ հայտարարությամբ հանդես գալ, և դա էլ անգամ բավարար է, որպեսզի մեր երազանքն իրականանա՝ ակնկալում ենք, որ երբևիցե տասը միլիոնը սատարելու է մեր խնդիրների լուծմանը՝ լինի Արցախում, Հայաստանում, արտերկրում, թե Սփյուռքում, բայց հավատացեք՝ որքան մեծ մասնակցություն ունենանք ռազմավարական ծրագրերին, այնքան կարող ենք ներկայանալ աշխարհին, այլապես բարձրաձայնելով՝ տասը միլիոն ենք, բայց եթե երբեք չանցնենք տասը տոկոսը այդ ծրագրերին մեր իրական մասնակցությամբ, մեր բարեկամները և մեր թշնամիները կսկսեն կասկածել մեր տասը միլիոնի վրա»,- հավելեց Արթուր Աղաբեկյանը: