Նոյեմբերի 13-ին մահացած Հոկտեմբերի 27-ի գործով ցմահ դատապարտյալ Էդիկ Գրիգորյանի մահվան հանգամանքները պարզելու համար քրեական գործ է հարուցվել։ Ներկայումս քննություն է գնում։ Այս մասին «Առաջին լրատվական»-ի հետ զրույցում ասաց Գրիգորյանների շահերի ներկայացուցիչ Ռոբերտ Ռևազյանը։ «Գործ է հարուցվել, քննություն է գնում, բայց ուրիշ ոչ մի հարցի չեմ կարող պատասխանել և որևէ այլ ինֆորմացիա չեմ կարող տրամադրել»,- ասաց փաստաբանը։
Գործի քննության վերաբերյալ ինֆորմացիա տրամադրելու հարցում առանձնապես շահագրգռված չեն նաև Էդիկ Գրիգորյանի հարազատները։ Հայրը, որ դեպքի առաջին օրը լրատվամիջոցներով հայտարարում էր, թե իր որդուն սպանել են, այսօր ի պատասխան մեր բոլոր հարցերի միայն արձագանքում էր. «Ես ոչինչ չգիտեմ, ինձ ոչ մի բան մի հարցրեք, ինձ ոչ մի հարց մի տվեք»։
Էդիկ Գրիգորյանին սպանելու վերաբերյալ Գարեգին Գրիգորյանի հայտարարություններից հետո մենք գնացել էինք իենց տուն հարցազրույցի։ Հարցազրույցի համար նախնական պայմանավորվածություն կար, նշանակված էր օր և ժամ։ Սակայն երբ գնացինք հարցազրույցի, պարոն Գրիգորյանը, նրա որդին հրաժարվեցին վիդեոհարցազրույցից և առհասարակ որևէ հարցազրույցից։ Նրանք միայն մի քանի տեղեկություններ տվեցին մահվան օրը տեղի ունեցածից, շտապօգնությւան մեքենայի ժամանելու ժամերից։
Հոկտեմբերի 27-ին վերաբերող բոլոր հարցերը անպատասխան մնացին։ Երբ անցնում էինք այդ թեմաներին, միանգամից պատասխան էր հնչում՝ դա մեր գործը չի, մեզ միայն մեր որդու մահվան հանգամանքներն են հետաքրքիր։
Այսօր արդեն, պարզվում է, որ իրենք չեն ցանկանում խոսել անգամ Էդիկ Գրիգորյանի մահվան հանգամանքներից, շտապօգնության բժշկից, նրա միջամտություններից։
Այս ամենը հիմք է տալիս եզրակացնելու, որ նրանց վրա ճնշում կա, կամ սպառնալիք է եղել առհասարակ չխոսել և չանդրադառնալ կատարվածին։
Գրիգորյանները, սակայն, կարող են հակառակը ապացուցել իրենց պահվածքով։