«Իշխանությունների նկատմամբ անվստահության մակարդակը բարձր է։ Եվ դա է պատճառը, որ հասարակությունը կասկածում է համաձայնագրի ստորագրման հարցում»,- «Առաջին լրատվական»-ի հետ զրույցում ասաց Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանը՝ միևնույն ժամանակ ընդգծելով, որ վերջին ամսվա ընթացքում մեր արտգործնախարարությունը լուրջ աշխատանք է տարել տեխնիկական խնդիրները վերացնելու ուղղությամբ։
Ստեփան Գրիգորյանը նշում է՝ մենք ունենք 2013-ի անհաջող փորձը և, ըստ մեր զրուցակցի, իրավունք ունենք կասկածելու, որ վերջին պահին մոսկովյան զանգը կարող է խափանել ստորագրությունը: «Այդ վտանգներն այսօր չկան, գիտեմ, որ Ռուսաստանի հետ կոնսուլտացիաներ են եղել, և բոլոր մտահոգությունները հարթված են։ Բայց նույնիսկ այդ ամենն իմանալով՝ ես էլ մտածում եմ՝ կարո՞ղ է վերջին պահին ինչ-որ բան կատարվի»,- ասաց մեր զրուցակիցը։
Ստեփան Գրիգորյանը նշում է՝ ցավոք, այսօր քաղաքական դաշտը չի արտացոլում մեր ժողովրդի պահանջներն ու ցանկությունները, և դա է պատճառը, որ մենք այսօր չենք տեսնում ոգևորություն այս համաձայնագրի ստորագրման հետ կապված։ Եթե համաձայնագիրը չստորագրվի, ըստ մեր զրուցակցի, հասարակությունը փողոց դուրս գալու փոխարեն կդիմի «ոտքերով ընտրությանը»՝ արտագաղթին։
Հարցազրույցն ամբողջությամբ՝ տեսանյութում:
