«Առաջին լրատվական»-ի հետ զրույցում հրապարակախոս Հրանտ Տեր-Աբրահամյանը նշեց, որ իշխանամետ ճամբարի ներկայացուցիչների արձագանքը, հայտարարությունները ՀԱԿ-իշխանություն երկխոսության վերաբերյալ բնական է համարում։
«Սպասելի էր, որ այս պարագայում իշխանության մարտավարությունը լինլու է՝ հնարավորինս ցրել հստակությունը երկխոսության օրակարգի և ձևաչափի վերաբերյալ։ Ամեն դեպքում, այս մարտավարությունը շատ սահմանափակ ռեսուրս ունի»,- կարծում է Հրանտ Տեր-Աբրահամյանը, քանի որ, ըստ նրա, բավական հստակ այլընտրանք կա այսօր. Կա՛մ երկխոսությունը կայանում է հստակ օրակարգով, հստակ ձևաչափով (այլ ոչ թե՝ ինչպես իշխանության ներկայացուցիչներն են ասում՝ խոսենք ինչ-որ հարցերի շուրջ, ինչ-որ նախարարությունների, գերատեսչությունների ներկայացուցիչների հետ), կա՛մ տեղի են ունենում այլ գործընթացներ.
«ՀԱԿ-ն անցնում է շուրջօրյա հանրահավաքների կամ նման ֆորմատի. ուրիշ այլընտրանք այսօրվա իրավիճակում չկա»,- համոզված է մեր զրուցակիցը։
Ինչ վերաբերում է ՀՀԿ տարբեր ներկայացուցիչների տարաբնույթ, հաճախ հակասական հայտարարություններին, Հրանտ Տեր-Աբրահամյանը նշեց.
«Եթե իրենք լուրջ և հավաքական քաղաքական ուժ լինեին, այդպես չէր լինին և շատ ավելի լուրջ կվերաբերվեին այս հարցին»։
Հրապարակախոսի կարծիքով՝ այս կերպ իշխանական ճամբարի ներկայացուցիչներն ավելի շատ փորձում են «գեղական շուստրիության միջոցով» ինչ-որ ցրողական գործողություններ կատարել՝ մտածելով, թե որոշակի արդյունք կապահովեն։
«Սա է իրենց մտածելակերպը։ Դա, իհարկե, կարող է ինչ-ինչ արդյունքներ տալ, բայց՝ բացառապես կարճատև հեռանկարում։ Երկարաժամկետ հեռանկարում սա շատ անարդյունավետ մարտավարություն է»։