ԱԻՄ առաջնորդ Պարույր Հայրիկյանը ապագաղութացման կոչեր անողներին հորդորում է միանալ ԱԻՄ-ին։ «Առաջին լրատվական»-ի հետ զրույցում Պարույր Հայրիկյանը նշեց, որ այդպիսի կոչեր անողները՝ բոլորն ունեն հետին նկատառում։
«Ես բանտում եղած մարդկանց մասին չեմ ուզում խոսել, բայց ընդհանրապես որևէ մեկը ինձ հետ խոսելուց առաջ պիտի զգաստ կանգնի, պատիվ տա, թույլտվություն ստանա խոսելու, հետո նոր խոսի այն ծրագրերի մասին, որոնց համար ես 18 տարի բանտ եմ նստել և հաղթական եմ նստել, հանկարծ գալիս ինձ ասում են՝ ապագաղութացման պայքարի համար որևէ մեկը էլ պետք չէ։ Արի ասա՝ ինչպես պայքարենք, մի անգամ հաղթել ես, լիարժեք չես հաղթել, կատարյալ չես հաղթել, դու էլ ասում ես՝ բայց Հայաստանը միջազգային իրավունքի սուբյեկտ է, չէ՞, Հայաստանը վաղը կարող է Եվրոպական միության հետ համաձայնագիր կնքել, եկեք էդ հարցը թողնենք՝ տասներորդական է։
Ես չեմ ասում՝ միայն «Սասնա ծռերը», այլև բոլորը, ովքեր ինչ-որ բան են ձեռնարկում, իրենց կարծիքով, ազգային կարևորության, շատ կարևոր է, որ նկատի ունենան՝ իրենք բախտ ունեն ունենալու մի մարդու իրենց կողքին, որը պատրաստ է, ի վիճակի է աշխատելու և ունի մեծ փորձ, թող պոռոտախոսություն չթվա՝ 300 մլն մարդու ազատագրման հարցում կարևոր դերակատարություն ունենալու մարդու, միջազգայնորեն ճանաչված մարդուն ճիշտ է հարցնել՝ ի՞նչ կարծիքի եք: Ես չեմ նկատել, որ որևէ մեկը այդ տարրական գրագիտությունը, չեմ ասում՝ պարկեշտությունը, ունենա, որոշ դեպքերում հարցնելու՝ պարոն Հայրիկյան, դուք ի՞նչ կարծիքի եք»,- շեշտեց նա։
Մանրամասները՝ տեսանյութում: