Վրաստանի հատուկ նշանակության ջոկատը վերսկսել է Թբիլիսիի ծայրամասի շենքի գրոհը, որի երկրորդ հարկում են գտնվում ահաբեկչության մեջ կասկածվողները: Այս մասին հայտնում է «Ռուսթավի 2» հեռուստաալիքը:
Ալիքը ներկայացրել է կադրեր բնակելի շենքի տանիքից, որտեղ ընթանում է հատուկ գործողությունը: Հատուկ նշանակության ջոկատն արցունքաբեր գազ է կիրառում, շենքում գտնվողները պատուհաններից նռնակներ են նետում:
«Ինտենսիվ հրաձգությունը շարունակվում է: Բնակարանը, որտեղ գտնվում են ենթադրյալ ահաբեկիչները, ուժեղ ծխով է ծածկվել: Շենքում ապրող բոլոր մարդիկ տարհանվել են»,- հայտնում է հեռուստաընկերությունը:
Հատուկ գործողությունը շարունակվում է մոտ 19 ժամ:
Ավելի վաղ Վրաստանի պետանվտանգության ծառայության հաղորդագրությունում ասվում էր, որ Թբիլիսիում հակաահաբեկչական գործողություն է անցկացվում, արգելափակված կասկածյալները կրակ են բացել հատուկ ջոկատայինների ուղղությամբ։
«Ռուսթավի 2» հեռուստաալիքը հայտնել էր, որ հատուկ գործողության նպատակը 2 օտարերկրացիների ձերբակալելն է, ովքեր կասկածվում են ահաբեկչական կազմակերպությունների հետ կապի մեջ։