Երկու տարի առաջ Հայաստանում թռչնաբուծական բիզնեսով զբաղվող, Բաղրամյանի թռչնաբուծական ֆաբրիկայի սեփականատեր Արմեն Խաչատրյանը կանգնեց լուրջ խնդիրների առաջ, նրան հայտարարեցին «ազգի դավաճան» և ստիպեցին դադարեցնել բիզնես գործունեությունը, արտագաղթել միայն այն պատճառով, որ հանդգնել էր դրսից ձու ներկրել, այստեղ մակնշել և վաճառել։ Սննդի անվտանգության ծառայությունը, պատկան այլ մարմիններ այնպիսի աղմուկ բարձրացրեցին, որ գործարարը կանգնեց լուրջ խնդիրների առաջ, հայտնվեց սնանկ կարգավիճակում։
Ուշագրավ է, սակայն, որ տևական ժամանակ է՝ Հայաստանում կրկին վաճառվում են դրսից ներկրված հավկիթներ, որոնց վրա առկա կնիքները դրա վառ ապացույցն են։ Մեր տեղեկություններով՝ հավկիթները ներկրում է «Արաքս» թռչնաբուծական ֆաբրիկան։ Եվ որքանով էլ ուշագրավ է, ներկրված հավկիթները վաճառվում են երկու անգամ թանկ գնով։ Հիշեցնենք, սակայն, որ Արմեն Խաչատրյանը, երբ ձու էր ներկրում, այն վաճառվում էր 30-40 դրամով։ Իսկ հիմա 60-70 դրամով է վաճառվում։ Մինչդեռ տրամաբանությունը հուշում է, որ ներկրվածը պետք է որ ավելի մատչելի լիներ։ Ամեն դեպքում, ներկայումս ՍԱՊԾ-ն ոչ մի աղմուկ չի բարձրացրել, քանի որ շուկայում դեֆիցիտ է, ձվի անհրաժեշտություն կա, և այդպիսով փորձ է արվում դեֆիցիտը վերացնել։
«Առաջին լրատվական»-ը Արմեն Խաչատրյանի կնոջից փորձեց հետաքրքրվել՝ իրե՞նք էլ դեռևս կապ ունեն շուկայում հայտնված ներկրված հավկիթների հետ։ Կինը, սակայն, մեզ հետ զրույցում նշեց, որ դրա հետ իրենք ոչ մի առնչություն չունեն, բայց իրենք էլ են նկատել՝ ներկրված ձվեր կան շուկայում ու որ դրա դեմ առանձնապես պայքար չկա պատկան մարմինների կողմից, որը իրենց դեպքում այդքան ընդգծված էր։
Նշենք, որ Արմեն Խաչատրյանի սնանկության գործը դատարանում է, սնանկության գործով կառավարիչ է նշանակվել։ Գործարարը պնդում է, որ ինքն այս վիճակում հայտնվեց, քանի որ «կլիչկա չուներ», «կրիշ չուներ», սովորական մարդ էր, որը փորձում էր բիզնեսով զբաղվել։