Շենգավիթ վարչական շրջանի ընդհանուր իրավասության դատարանում դատավոր Արթուր Օհանյանի նախագահությամբ այսօր շարունակվում է «Սասնա ծռեր» խմբի գործով առանձնացված 2-րդ մասով դատական նիստը:
Ինքնաբացարկի վերաբերյալ դիրքորոշում հայտնեցին «Սասնա ծռեր» խմբի անդամները: Վարդան Գերավետյանը նշեց. «Դուք ձեր խիղճն ազատեք, ակնհայտ է, որ դուք կաշկանդված եք, ես տեսնում, որ դուք մարդկային հատկանիշներ ունեք, մի դարձեք կամակատար»,- ասաց Գերավետյանը, ապա հիշեցրեց. «Առաջին դատական նիստը չէ, որ մեղադրողները բավականին անփույթ են վարվում իրենց պարտականություններին: Տարբեր դատավորների քննության ժամանակ նմանատիպ երեւույթներ եղել են, երբ դատախազներն առանց լիազորագրի են եկել, լքել են նիստերի դահլիճը: Նայելով զարգացումներին՝ մենք տեսնում ենք, որ դատարանները դրսից ուղղորդվում են, որոշում են կայացնում, երբ նրանց հրահանգում են ինչ անել: Ինձ թվում է, որ Դուք էլ ձեր խիղճը կազատեք, թող մեկ ուրիշը գա ձեր փոխարեն, ես տեսնում եմ, որ Դուք այդպիսին չեք»,- ասաց նա: