Չինաստանի բնակչությունը ներկայումս կազմում է մոտ 1 մլրդ 399 մլն մարդ: Այս մասին վկայում է երեքշաբթի երկրի հասարակական անվտանգության նախարարության հրապարակած վիճակագրությունը:
Այս տեղեկությունը ստացվել է նոր համազգային տվյալների բազայի հիման վրա: Չինաստանի բնակչության թիվը 2016 թ. դրությամբ կազմել է 1 մլրդ 382 մլն 271 000, ինչն 8 մլնով ավել է 2015 թ. ցուցանիշից: Երկրի 16-60 տարեկան աշխատունակ բնակիչների թիվը 2016թ. վերջին կազմել է 907,47 մլն՝ ընդհանուր բնակչության 65,6%-ը:
Չինաստանում վերջին տարիներին բնակչության ծերացում է նկատվում: Վերջին տվյալները ցույց են տալիս, որ ներկայումս այդ երկրում հաշվվում է 60 տարեկանից մեծ ավելի քան 230 մլն մարդ, ինչը երկրի բնակչության ընդհանուր թվի 16,7%-ն է:
Նախնական կանխատեսումներով՝ մինչև 2020 թ. Չինաստանում մոտ 1 մլրդ 420 մլն մարդ կապրի: