Լուրեր
Երեխային վերաբերող հարցերում երեխայի շահերը պետք է առաջնահերթ ուշադրության արժանանան. ԱԺ նախագահ
  • 19:47
  • 2017-11-20
  • Դիտումներ՝ *

ՀՀ ԱԺ նախագահ Արա Բաբլոյանի բացման խոսքը Ազգային ժողովի՝ երեխայի իրավունքների պաշտպանությանը նվիրված հատուկ նիստում.

«Սիրելի երեխաներ, հարգելի գործընկերներ, հարգարժան հյուրեր,

նախ բոլորիս շնորհավորում եմ Երեխաների համաշխարհային օրվա առթիվ:

Սա երեխաներին վերաբերող երկրորդ տոնն է պաշտոնական տոնացույցում, սակայն բոլորիս համար էլ պարզ է, որ այն, ինչ, վերաբերում է երեխաներին, մշտապես դուրս է պաշտոնականության սահմաններից ու ձևաչափերից:

25 տարի առաջ Հայաստանի Հանրապետությունը նույնպես վավերացրեց «Երեխայի իրավունքների մասին» կոնվենցիան: Իսկ այսօր Հայաստանի Հանրապետության Ազգային ժողովը միանում է ՅՈՒՆԻՍԵՖ-ի համաշխարհային նախաձեռնությանը` պաշտոնական խոսափողը տրամադրելով երեխաներին:

Երեխայի իրավունքներն ու դրանք պաշտպանելու պարտավորությունը մենք ամրագրել ենք նաև համապատասխան օրենսդրական հիմքով, նախ և առաջ, երկրի հիմնական օրենքով: ՀՀ Սահմանադրության համապատասխան հոդվածները մասնավորապես արձանագրում են. երեխան իրավունք ունի ազատ արտահայտելու իր կարծիքը, որը երեխայի տարիքին ու հասունության մակարդակին համապատասխան՝ հաշվի է առնվում իրեն վերաբերվող հարցերում:

«Երեխային վերաբերող հարցերում երեխայի շահերը պետք է առաջնահերթ ուշադրության արժանանան:

Ծնողներն իրավունք ունեն և պարտավոր են հոգ տանել իրենց երեխաների դաստիարակության, կրթության, առողջության, լիարժեք ու ներդաշնակ զարգացման մասին»:

Սակայն մեր վերաբերմունքն ու ըմբռնումներն արձանագրել ենք ամենից առաջ մեր ազգային արժեհամակարգում: Չափազանցած չեմ լինի, եթե ասեմ, որ մեզանում, իսկապես, յուրահատուկ սրտացավություն կա ընտանիքի, երեխայի, նրա ապագայի ու ճակատագրի հանդեպ:

Այլ բան է, որ մեր ընկալումներում և ամենօրյա գործունեության մեջ դեռ շատ անելիքներ ունենք, որպեսզի երեխաների համար ապահովենք ավելի բարեկեցիկ մանկություն: Հաճախ երեխայի իրավունքների պաշտպանություն ասվածը փորձում ենք տեղավորել մեր պատկերացումների շրջանակում` առանց հաշվի առնելու, թե ինչպես է երեխան ինքը պատկերացնում այդ ամենը: Այսօր, Ազգային ժողովի դահլիճում գումարված հատուկ նիստում, այս պատասխանատու և լսելի ամբիոնից մեր երեխաները կբարձրաձայնեն նաև իրենց պատկերացումները: Միասին պետք է խոսենք այն մասին, որ լավագույն փաստաթուղթն անգամ չի կարող երաշխավորել բավարար կենսապայմաններ և ապահով մանկություն երեխաների համար, եթե բոլորս, աշխարհի մարդիկ չգիտակցենք, որ երեխան իսկապես բարձրագույն արժեք է, այսօրվա իրավունքներով և ապագայի հույսերով: Մենք պետք է կեցության այնպիսի արժանապատիվ պայմաններ ստեղծենք, որպեսզի երեխաներն ապրեն ընտանիքում, ծնողի, հարազատի, ընտանեկան հովանու ներքո, ընտանեկան ջերմության պայմաններում:

Սա ևս մեկ հիշեցում է հասարակության, պետության, մարդու բարոյական պարտքի մասին առ այն, որ երեխայի լավագույն պաշտպանությունն ընտանեկան միջավայրի ապահովումն է, իսկ նրա զարգացման լավագույն երաշխիքը` ընտանիքը:

Երեխաների համաշխարհային օրը մեծահասակներին ընտանեկան, պետական, համաշխարհային մակարդակով ևս մեկ անգամ հիշեցնում է երեխաների` լիարժեք կյանքով ապրելու և երջանիկ մանկություն ունենալու, որակյալ բուժօգնություն ու կրթություն ստանալու, հանգստանալու, ֆիզիկական և հոգեբանական բռնությունից պաշտպանվելու, սեփական կարծիք ունենալու և մյուս իրավունքների մասին:

Հարգե’նք, պահպանե’նք ու պաշտպանե’նք այդ իրավունքները և ոչ միայն այսօր:

Ստեղծե’նք այն բարենպաստ միջավայրն ու բարեկեցիկ կենսապայմանները, որոնք յուրաքանչյուր երեխայի հնարավորություն կտան ապրել ու ժպտալ երջանիկ, խաղալ ու զարգանալ առողջ, աճել ու վստահորեն բարձրանալ կյանքի աստիճաններով:

Եվս մեկ անգամ ողջունում եմ բոլորիդ և մաղթում անկաշկանդ ու անկեղծ մասնակցություն:

  • Դիտումներ՝ *