Եթե կլոր սեղանի ձևաչափով քննարկումները արդյունավետ չլինեն, կկիրառվի պայքարի այլ միջոց, կօգտագործվեն այլ գործիքներ։ Այս մասին «Առաջին լրատվական»-ի հետ զրույցում ասացին «Հանուն գիտության զարգացման» նախաձեռնության անդամներ Դավիթ Պետրոսյանը և Գարիկ Պետրոսյանը։
«Փողոցը պահելու մեխանիզմը պարզ է, եթե ունենք սկզբունքներ, գաղափար, գաղափարի հետևից գնացող մարդիկ, իրենք պատրաստ են ցանկացած պահի նորից դուրս գալ փողոց՝ իրենց պայքարը այդ եղանակով շարունակելու: Իհարկե, մենք այդ ուղղությամբ նաև աշխատում ենք, կազմակերպչական բաներ են տեղի ունենում։ Մենք համաձայն ենք այն մարդկանց հետ, ովքեր ասում են՝ փողոցը պետք է պահել. կարելի է ասել, որ այդ փողոցային պայքարի միջոցով հասանք ինչ-որ քննարկումների»,- շեշտեց Գարիկ Պետրոսյանը։
Դավիթ Պետրոսյանն էլ ընդգծեց, որ հանրային քննարկումը ցույց տվեց, որ կլոր սեղանի գնալը շատ ճիշտ էր, կան շատ խնդիրներ, առաջարկներ, որոնք բարձրաձայնելու, հանուն դրանց լուծման պայքարելու համար մարդիկ մինչև այժմ հարթակ չեն ունեցել։ Դավիթ Պետրոսյանի խոսքով՝ հանրային քննարկման ժամանակ փորձ է արվել լուծել երկու խնդիր, նախ՝ փաթեթով առաջարկությունները, խնդիրները ներկայացնելու, հետո էլ հասկանալու, որ պատրաստ են նաև փողոցային պայքարը շարունակելու։
«Կոնկրետ հենց ամսի 22-ին որոշել ենք Գիտությունների ազգային ակադեմիայի մոտ տեսակամուրջի, ուղիղ եթերի միջոցով ապահովել նաև կապը ԱԺ-ից ժողովրդի հետ։ Դա լինելու է ոչ միայն դիտում, այլև ԱԺ-ից դուրս գալուց հետո պիտի քննարկենք հետագա անելիքները։ Հատկանշական է, որ այսպիսի առաջարկությամբ էին հանդես եկել այն մարդիկ, որոնք մինչև հիմա նախաձեռնության մեջ բարձր մասնակցություն չէին ունեցել»,- ընդգծեց նա։
Նախաձեռնության անդամները նաև ընդգծեցին՝ անկախ նրանից, որ ՊՆ պաշտոնյաների, նախարարի, փոխնախարարի մակարդակով խոսում են այն մասին, թե փոփոխություններ չեն լինելու, իրենք անելու են ամեն ինչ փոփոխությունների հասնելու համար։ Ինչ վերաբերում է հայտարարություններին, թե փոփոխություններ չեն լիենլու, ապա տղաները զարմանում են՝ բա ինչո՞ւ են համաձայնում բանակցել։
«70 ենթաօրենսդրական ակտերը պետք է կառավարության որոշումով լինեն, մենք շեշտադրում կատարելու ենք ոչ միայն ենթաօրենսդրական ակտերով փոփոխությունների վրա, որպեսզի հնարավորինս լայն զանգվածների շահերը ներկայացված լինեն, այլ նաև բուն օրենքում, դրույթներում փոփոխություններ կատարվեն»,- ընդգծեց Դավիթ Պետրոսյանը։
Նախաձեռնության անդամները նաև ընդգծեցին, որ կլոր սեղան քննարկումների ժամանակ անդրադառնալու են նաև «Ես եմ», «Պատիվ ունեմ» ծրագրերին։ Կոնկրետ «Պատիվ ունեմ» ծրագրերից յուրաքանչյուր մասնագիտության պարագայում չէ, որ հնարավոր է օգտվել, բացի այդ՝ 3 տարի ծառայությունն էլ վիճելի է գիտության, կրթության անընդհատության համատեքստում։
Մանրամասները՝ տեսանյութում: