«Երկխոսությունը չի նշանակում, թե իշխանություններն այնքան են թուլացած, որ պիտի գնան ցանկացած պահանջի կամ առաջարկության կատարաման»։ Այսօր լրագրողների հետ հանդիպման ժամանակ նման հայտարարություն արեց ՀՀԿ խմբակցության պատգամավոր Գագիկ Մելիքյանը։
Անդրադառնալով օրերս Արամ Մանուկյանի արած այն հայտարարությունը, թե ՀԱԿ-ը սպասում է կոնկրետ Սերժ Սարգսյանի պատասխանին և որ «կարող է հայտարարություն անել անգամ Սերժ Սարգսյանի աշխատակազմի պահակը, միայն թե նա պետք է ասի, որ այդ հայտարարությունն անելու համար իրեն լիազորել է Սերժ Սարգսյանը», ՀՀԿ-ական պատգամավորն ասաց, թե չի կարծում, որ որևէ լրացուցիչ բան կարող է ասվել Սերժ Սարգսյանի կողմից։
«ՀԱԿ առանձին առաջնորդներ, քաղաքական գործիչներ եթե ընդամենը պահակների մակարդակով են մինչև այժմ բանակցությունների նստել և դա է իրենց ամենաբարձր մակարդակը բանակցություններ իրականացնելու համար, ապա կարող են հանդիպել նաև ՀՀԿ-ի պահակի հետ և տղայական պատասխան լսել՝ ընդամենը կասի հետևյալը՝ այ տղեք գնացեք ուրիշ տեղ խաղացեք, թեկուզ՝ տունտունիկ։ Ես չեմ կարծում, որ դա խոսելաոճ է, չեմ կարծում, որ դա ընդունելի է և չի կարելի լկտիություն ցուցաբերել հատկապես լուրջ առաջարկություններին»,- ասաց Գ.Մելիքյանը։
