Ադրբեջանը մտադիր է գնել Ռուսաստան-Հայաստան գազատարի` Վրաստանով անցնող հատվածը,- այսօր գրում է ռուսաստանյան Независимая Газета պարբերականը:
Ռուսաստանյան պարբերականի վկայությամբ` Ադրբեջանի պետական նավթային կոմիտեի նախագահ Ռովնագ Աբդուլաևը լրագրողներին հայտնել է, որ իր ղեկավարած կոմիտեն արդեն դիմել է խողովակաշարի սեփականատիրոջը` Վրաստանի պետական գազային ընկերությանը, իր շահագրգռվածությունը հայտնելով մասնակցել գործընթացին խողովակաշարի սեփականաշնորհման կամ կառավարման հանձնման դեպքում:
Վրաստանի խորհրդարանը այս ամռանը ընդունեց օրինագիծը, որով Հյուսիս-հարավ մայրուղային գազատարը հանվեց ռազմավարական օբյեկտների ցանկից և կարող է ենթակա լինել սեփականաշնորհման: Դա, սակայն, կարող է տեղի ունենալ 2011 թ. ապրիլից հետո, երբ լրանում է գազատարի վաճառքն արգելող համաձայնության հնգամյա ժամկետը:
Գազատարի վրացական հատվածի հնարավոր վաճառքը Ադրբեջանին հայկական կողմի անհանգստությունն է հարուցում, թեև Ադրբեջանը վստահեցնում է, թե տվյալ նախագծում իր նպատակները միայն տնտեսական են: