«Հինը նա է, ինչը որ հին է, արհեստական հին չի կարող լինել»,- «Առաջին լրատվական»-ի հետ զրույցում ասաց ճարտարապետ Գուրգեն Մուշեղյանը՝ անդրադառնալով Հին Երևան ծրագրին։ Ճարտարապետի խոսքերով՝ ամբողջ աշխարհում ընդունված է, որ չի կարելի ձեռք տալ ոչ հնությանը, ոչ նորին։ «Եթե կառուցվում է մի բան, դա արդեն հեղինակային իրավունք է, դրան չի կարելի ձեռք տալ։ Չի կարելի դա ոչնչացնել, այլասերել, այլանդակել քաղաքի տեսքը։ Հինը պետք է հին մնա, որ մենք դա զգանք։ Քաղաքաշինություն նշանակում է ընդունել ժառանգությունը, լուծել այսօրվա խնդիրները, առանց վնասելու հինը, և չփակել ապագայի ճանապարհը։ Այսինքն՝ ներդաշնակությունը պետք է ապահովել։ Այլ կերպ՝ անընդհատ հինը քանդելով և նորը կառուցելով, մենք չենք կարող պահպանել ոչ մեր պատմությունը, ոչ էլ մեր ավանդույթները։ Մարդիկ աշխարհով շրջագայում են հինը տեսնելու համար»,- ասաց մեր զրուցակիցը։
Ինչ վերաբերում է Հյուսիսային պողոտայի կառուցմանը, ապա, ճարտարապետի խոսքերով՝ դա դժվար է համարել բնակելի թաղամաս, այն հիմնականում ժամանցի վայր է՝ հասարակական սննդի օբյեկտներով հագեցած։ «Երբ որ սկսվում էր Հյուսիսային պողոտայի կառուցումը, ովքեր որ ֆինանսապես ապահովված էին, սկսեցին գույք ձեռք բերել՝ գնել-վաճառել։ Թե չէ բնակելի թաղամասերը պետք է բակեր ունենան, երեխաները խաղան, հարևանություն անեն։ Իսկ այստեղ ճիշտ հակառակն է։ Մարդիկ պարզապես անշարժ գույք են ձեռք բերել այդ տարածքում։ Իսկ նախագծելիս, իմ նշած հարցերը հաշվի չեն առնվել, քանի որ նախորդ իշխանությունների կողմից խնդիր էր դրված կառուցել Հյուսիսային պողոտան, ցույց տալու համար, որ տնտեսությունը, շինարարությունը աշխուժանում է»,- ասաց Մուշեղյանը։
Առավել մանրամասն՝ տեսանյութում։