«Հարկայինի գործելաոճը տոնավաճառի աշխատակիցների նկատմամբ պոպուլիզմ է, աշխատանքի իմիտացիա։ Հայաստանում կան լիքը խնդիրներ, լիքը տնտեսվարողներ, խոշոր բիզնեսի ներկայացուցիչներ, որ հարկեր չեն մուծում։ Թող առաջին հերթին նրանց բերեն հարկային դաշտ։ Տոտալ վերահսկողությունը բիզնեսի վրա անհնար է»,- «Առաջին լրատվական»-ի հետ զրույցում ասաց «ՓՄՁ համագործակցության ասոցիացիա» ՀԿ փոխնախագահ Սամսոն Գրիգորյանը։
Գրիգորյանի խոսքերով՝ ՓՄՁ-ն ամենաթույլ օղակն է, մանր բիզնեսին հարվածելն ամենահեշտն է, դրա համար էլ հարկայինը կենտրոնացել է ՓՄՁ-ների վրա։
Ինչ վերաբերվում է տոնավաճառի աշխատակիցներին անվճար հաշվապահներ տրամադրելուն, ապա դա, Գրիգորյանի խոսքերով, անիրագործելի է․ «Ամբողջ աշխարհում բիզնեսի նկատմամբ տոտալ վերահսկողութուն չկա։ Ինչքան դու բիզնեսին դնում ես վերահսկողության տակ, այնքան հարկեր ես կորցնում։ Վերջին երկու տարվա ընթացքում, երբ Շրջանառության հարկի վերաբերյալ օրենքը չընդունվեց, և առևտրականները մի քիչ ազատ մնացին, հարկերը աճեցին։ Բիզնեսը գնաց դեպի հարկային դաշտ։ Ես կողմ եմ, որ հարկերը վճարվեն, բայց հարկայինի գործելաոճը ընդունելի չէ։ Հարկայինը շատ այլ գործիքներ էլ ունի վերահսկողության։ Բայց գնալ, ընկնել շուկաներով, կանգնել դռների դիմաց և թույլ չտալ, որ մարդը մտնի շուկա, դա արդեն չի նշանակում վերահսկողություն։ Դա նշանակում է, որ ՊԵԿ-ը պարզապես ցանկանում է տուգանել»։