«Ժառանգություն» կուսակցության փոխնախագահ Արմեն Մարտիրոսյանի կարծիքով՝ այս կառավարությունն ի սկզբանե չէր կարող արդյունավետ աշխատել մի շարք պատճառներով. «Առաջինը՝ Կարեն Կարապետյանը հենց այս համակարգի մարդ է, և հետո՝ Հայաստանում որևէ մեկը չի կարող արդյունավետ աշխատել՝ մինչև կառավարման համակարգը արմատապես չփոխվի»,- «Առաջին լրատվական»-ի հետ զրույցում, արդրադառնալով «Ծառուկյան» դաշինքի պատգամավորների քննադատությանը՝ կառավարության հասցեին, ասաց «Ժառանգություն» կուսակցության փոխնախագահ Արմեն Մարտիրոսյանը։
Մեր զրուցակիցը նշում է, որ խորհրդարանական ընդդիմությունը չունի լծակներ, որպեսզի վարչապետի և կառավարության հրաժարականի պահանջ դնի։ Մարտիորսյանի խոսքերով՝ առավել ևս, այս կոնսոլիդացված խորհրդարանը նման խնդիր չի դնի. «Բայց ակնհայտ է, որ ժամանակն է, որ Կարեն Կարապետյանի հասցեին բացասական խոսքեր հնչեն, որովհետև Սերժ Սարգսյանի վարչապետության ժամանակն է մոտենում։ Այդ պատճառով քննադատությունը ոչ միայն ԲՀԿ-ից է, այլ նաև հենց ՀՀԿ-ի ներսից։ Այնպիսի փորձառու անձինք, ինչպիսիք են Գալուստ Սահակյանն ու Խոսրով Հարությունյանը, խոսում են նոր վարչապետի այլ կարգավիճակ ունենալու մասին և նշում են, որ իրենց համար այդ պաշտոնին միակ համապատասխան մարդը Սերժ Սարգսյանն է։ Դարձել ենք «վոժդիզմ» հիշեցնող պետություն, եթե Սերժ Սարգսյանը չլինի՝ Հայաստանը կործանված է»,- ասաց Մարտիրոսյանը։
Արմեն Մարտիրոսյանն ասում է՝ կառավարությանն ուղղված քննադատությունը տեղին է։ Նրա խոսքերով, սակայն, հարկ է ընդգծել, որ ընտրություններից անմիջապես հետո, հենց հաջորդ օրվանից վարչապետը հայտնվեց նաև ներիշխանական քննադատության թիրախում. «Մավրն իր գործն արեց, մավրը կարող է հեռանալ»։
«Արդյո՞ք ԲՀԿ-ն այդ քննադատությունները վարչապետի հասցեին հնչեցնում է, հետագայում Սերժ Սարգսյանի վարչապետության ժամանակ կոալիցիա կազմելու», հարցին ի պատասխան, մեր զրուցակիցն արձագանքեց. «Եթե կմտնեն կոալիցիա՝ դա առաջին դեպքը չի լինի, նորություն չի լինի։ Հայաստանում, ես, ցավոք սրտի, այլևս ոչ մի բանի վրա չեմ զարմանաում։ Պայքարի ժամանակ հագուստ պատռող ընդդիմադիրները դառնում են պրոիշխանական նախագիծ։ Ուր մնաց՝ այնպիսի չափավոր գործիչ, ինչպիսին Գագիկ Ծառուկյանն է, որը արմատական դիրքերից միշտ հանդես չի եկել՝ կոալիցիա չկազմի»,- եզրափակեց նա։
Հարցազրույցն ամբողջությամբ՝ տեսանյութում։