ՀՀ Տնտեսական մրցակցության պաշտպանության պետական Հանձնաժողովի նախագահ Արտակ Շաբոյանն, այսօր՝ նոյեմբերի 17-ին, երկօրյա պաշտոնական այցով մեկնել է Վրաստան՝ մասնակցելու Թբիլիսիում կայանալիք «Մրցակցության քաղաքականություն. միտումներ և մարտահրավերներ» թեմայով միջազգային համաժողովին:
ՏՄՊՊՀ-ից հայտնում են, որ համաժողովին մասնակցում են աշխարհի տարբեր երկրների մրցակցային մարմինների ղեկավարներ, ինչպես նաև այլ պաշտոնյաներ: Համաժողովի ընթացքում ՀՀ մրցակցային մարմնի ղեկավարը հանդես է եկել «Մրցակցային միջավայրի զարգացումը Հայաստանի Հանրապետությունում» թեմայով ելույթով:
Մասնավորապես Արտակ Շաբոյանը անդրադարձել է հատկապես վերջին տարիներին մեր երկրում մրցակցային միջավայրի բարեփոխման ուղղությամբ կատարված աշխատանքներին: ՏՄՊՊՀ նախագահը իր գործընկերներին է փոխանցել ՀՀ փորձը՝ մի շարք կարևոր ոլորտներում իրականացված բարեփոխումների վերաբերյալ: Մասնավորապես, Ա. Շաբոյանը անդրադարձել է պետական գնումների, անբարեխիղճ մրցակցության և մի շարք սոցիալական առաջնային նշանակության գերիշխող շուկաներում իրականացված ուսումնասիրություններին: