Սիդնեյի համալսարանի Էկոնոմիկայի և խաղաղության ինստիտուտը (IEP) հրապարակել է Ահաբեկչության գլոբալ ինդեքսը, որտեղ Հայաստանը զբաղեցնում է 75-րդ հորիզոնականը և գտնվում ահաբեկչության ամենացածր ազդեցությամբ երկրների թվում (2.374 միավոր՝ հնարավոր 10-ից)։
Փորձագետները կյանքի վրա ահաբեկչության ազդեցության բարձր մակարդակով երկրների ցուցակում են ներառել 6 պետություն. Իրաք (10 միավոր), Աֆղանստան (9,4 միավոր), Նիգերիա (9 միավոր), Սիրիա (8,6 միավոր), Պակիստան (8,4 միավոր), Եմեն (7,9 միավոր)։ Այս երկրները համապատասխանաբար զբաղեցնում են վարկանիշի առաջին 6 հորիզոնականները։
Թուրքիան 9-րդ, Իրանը 53-րդ, Վրաստանը 77-րդ, Ադրբեջանը 95-րդ տեղերում են։
Արևմտաեվրոպական պետություններում ահաբեկչության ամենաբարձր ազդեցությունը, փորձագետների գնահատականով, Ֆրանսիայում է (6 միավոր և 23-րդ հորիզոնական)։ ԱՄՆ-ը 32-րդ տեղում է (5.4 միավոր), Ռուսաստանը 33-րդն է (5.3 միավոր)։
Ահաբեկչության գլոբալ ինդեքսն իրենից ներկայացնում է համալիր հետազոտություն, որը չափում է ահաբեկչական ակտիվության մակարդակն աշխարհի երկրերում և ցույց տալիս, թե պետություններից որոնք և ինչ մասշտաբներով են բախվում ահաբեկչական սպառնալիքին։
Երկրորդ տարին անընդմեջ աշխարհում կրճատվում է ահաբեկչությունների զոհերի թիվը։ 2016 թվականին ահաբեկիչների ձեռքով զոհվել է 25 673 մարդ՝ 13 տոկոսով պակաս, քան 2015 թվականին։ Սակայն երկրների թիվը, որտեղ տարվա ընթացքում տեղի է ունեցել գոնե մեկ ահաբեկչություն, հասել է ռեկորդային ցուցանիշի՝ 77։ Հարձակումներն առավել հաճախ իրականացվում են միայնակ ահաբեկիչների կողմից։
Հետազոտության հեղինակները նշում են, որ 2016 թվականին ահաբեկչությունների 94 տոկոսն իրականացվել է Մերձավոր Արևելքում և Հյուսիսային Աֆրիկայում, Սահարայից հարավ ընկած աֆրիկյան երկրներում և Հարավարևելյան Ասիայում։