«Դժբախտաբար, մեզ մոտ քաղաքական դաշտը լճացած է։ Ժողովրդի մեջ կան տրամադրության փոփոխություններ, մարդիկ դժգոհ են Հայաստանում Ռուսաստանի վարած քաղաքականությունից, և կրիտիկական վերաբերմունքն ուժեղանում է։ Ժողովուրդը դինամիկ արձագանքում է ամեն ինչին, ԵՄ-ի, ՆԱՏՕ-ի նկատմամբ վերաբերմունքը փոխվել է, դրական տրամադրությունները շատացել են։ Բայց երբ նայում եք քաղաքական էլիտային՝ բավական կոնսերվատիվ արձագանքներ են։ Քաղաքական էլիտան հասարակական տրամադրություններին չի արձագանքում»,- «Առաջին լրատվական»-ի հետ զրույցում նման տեսակետ հայտնեց Գլոբալիզացիայի և տարածաշրջանային համագործակցության վերլուծական կենտրոնի նախագահ, միջազգայնագետ Ստեփան Գրիգորյանը։
Ստեփան Գրիգորյանը նշում է՝ բարեբախտաբար, իշխանություններն այժմ հասկանում եմ ԵՄ-ի հետ ստորագրվելիք համաձայնագրի կարևորությունը. «Եթե ԵԱՏՄ-ի շրջանակներում գոնե ինչ-որ հաջողություններ լինեին, ապա Սերժ Սարգսյանին պետք չէր լինի երիտասարդներին ասել՝ ես միայնակ չեմ որոշել ԵԱՏՄ անդամակցության հարցը։ Այսպիսի արդարացումներ լինում են, երբ վիճակը լուրջ է։ Նույն Սերժ Սարգսյանը մի քանի օր առաջ ասաց, որ ԵԱՏՄ-ն ամբողջությամբ սպասելիքները չի արդարացրել։ Լավ է, որ գոնե նախագահն ու իր թիմը դա հասկանում են, ու սա է ինձ համար երաշխիք, որ ԵՄ-ի հետ համաձայնագիրը կստորագրվի»։
Միջազգայնագետի խոսքով՝ Հայաստանում մեծ է ռուսական պրոպագանդան. «Այն քարոզչությունը, որ ուղղված է Ուկրաինայի և Վրաստանի դեմ, ապակողմնորոշում է նաև մեր հասարակությանը։ Հատուկ մեզ համար պրոպագանդա Ռուսաստանը չի իրականացնում։ Ասում են՝ նայեք, թե ինչ եղավ Վրաստանում ու Ուկրաինայում, բայց չեն ասում, թե ինչ դրական փոփոխություններ եղան կոռուպցիայի դեմ պայքարի հարցում կոնկրետ Վրաստանում։ Դա ավտոմատ տարածվում է նաև Հայաստանում։ Մեզ պրիմիտիվ իմաստով այս ամենին հակապրոպագանդա պետք չէ, բայց մեր միջոցներով պետք է ճիշտ պատկերը ներկայացնենք»։
Հարցազրույցն ամբողջությամբ՝ տեսանյութում:
