Վերջին 10 տարիներին գիտության ֆինանսավորման գումարները չեն կրճատվել, թեև չեն էլ ավելացել։ Այդ մասին «Առաջին լրատվական»-ի հետ զրույցում նշել է Հովակիմ Զաքարյանը:
Նրա խոսքերով՝ մինչև այս տարի կար երևի չգրված օրենք, որ գիտության ֆինանսավորմանը չկպչենք, որովհետև առանց այդ էլ այնքան ցածր է, որ էլ ո՞ւր նվազեցնես. «Բայց վերջին վարչապետը՝ Կարեն Կարապետյանը ասաց՝ չէ, գիտությանն էլ պետք է կպնել, որովհետև գիտությունը միայն խոսքով է առաջնահերթություն համարվում, իսկ գործով տեսնում ենք, որ ամենևին էլ առաջնային չէ։ Հաջորդ տարվա բյուջեում արդեն մոտ 7 տոկոսով նվազելու է գիտության ֆինանսավորումը։ Դա շատ տարօրինակ է, որովհետև կա օրենք, որը հստակ ասում է՝ գիտության ֆինանսավորումը պետք է ավելանա, եթե կա ՀՆԱ աճ։ Դրա համար նախորդ տարիներին, եթե անգամ կրթության ոլորտի ծախսերը կրճատվում էին, գիտության ծախսերը չէին կրճատվում, որովհետև օրենքը թույլ չէր տալիս։ Ես հիմա չգիտեմ, թե ինչպես են շրջանցում այդ օրենքը, բայց փաստն այն է, որ գիտության ֆինանսավորումը կրճատվում է և դա սարսափելի է»,- ասաց նա։
Հովակիմ Զաքարյանի ներկայացմամբ՝ Հայաստանում գիտությանը տրամադրվում է ՀՆԱ-ի 0․25 տոկոսը, այնինչ նորմալ երկրներում դա առնվազն 1 տոկոս է կազմում. «Ու հիմա այդ 0․25 տոկոսն էլ կրճատվում է։ Ես շատ կցանկանայի, որ դրսում աշխատող մեր գիտնականները վերադառնային, բայց եթե դա միայն խոսքի մակարդակով է, ոչինչ չի ստացվի»։
Հարցազրույցն ամբողջությամբ՝ տեսանյութում:
