Ապագա նախագահը իր բնույթով պետք է լինի ակադեմիական, նա չպետք է հակվածություն ունենա ո՛չ իշխող, ո՛չ ընդդիմադիր կուսակցությունների հանդեպ: Այս մասին հայտարարել է Վրաստանի խորհրդարանի նախագահ Իրակլի Կոբախիձեն «360 աստիճան» ծրագրի ժամանակ:
Նրա խոսքով՝ իշխող կուսակցությունը կընտրի ապագա նախագահին՝ հիմնվելով նրա փորձառության, վարկանիշի և համապատասխան իմիջի վրա:
«Մենք անպայման կունենանք նախագահի մեր թեկնածուն: Նախագահը պետք է վեր կանգնած լինի կուսակցությունից: Ապագա նախագահը բնույթով պետք է լինի ակադեմիական: Մենք կառաջնորդվենք ընդհանուր չափանիշներով: Կարևոր են փորձառությունը, վարկանիշը, համապատասխան իմիջը, և դա կլինի օբյեկտիվ չափանիշ, որի հիման վրա մենք կընտրենք նախագահի թեկնածու: Նա պետք է լինի չեզոք, իսկ դրա համար կարևոր են ոչ թե նրա նախկին կապերը որևէ քաղաքական կուսակցության հետ, այլ անձնական որակները»,- հայտարարել է խորհրդարանի նախագահը:
