Իրանը Սիրիայի տարածքում ռազմաբազա է կառուցում: Այս մասին հաղորդում է ВВС-ն՝ հղում անելով արևմտյան հետախուզության ինչ-որ աղբյուրի: Խոսքը Դամասկոսից 14 կմ հարավ ընկած հողատարածքի մասին է:
Արբանյակային լուսանկարներից երևում են մոտ 2 տասնյակ շենքեր, որոնք կառուցվել են այդ հողատարածքում: Ենթադրաբար, դրանք նախատեսված են զինվորների տեղակայման համար: Բացի այդ, լուսանկարներում կարելի է տեսնել մի քանի ավտոտնակներ, որոնցից յուրաքանչյուրը կարող է տեղավորել 6-8 տրանսպորտային միջոց: Լուսանկարների վերլուծությունը ցույց է տալիս, որ վերջին կես տարում մի քանի շենքեր վերանորոգվել են:
Լուսանկարները վերլուծած մասնագետների կարծիքով՝ բազայի տարածքում չկա զենքի ոչ պայմանական որևէ նշան:
Չի բացառվում, որ վերջին շաբաթներին կառուցվող բազա են այցելել իրանական զինվորական պաշտոնյաներ:
