Խարբերդցի ամուսինը երեխային դպրոց տանելու հարցով վեճի ժամանակ ծեծելով պատռել է կնոջ փայծաղը

Շենգավիթ վարչական շրջանի ընդհանուր իրավասության դատարանում Դավիթ Բալայանի նախագահությամբ ավարտվել է Գերասիմ Մ.-ի գործի դատական քննությունը:

46-ամյա Գերասիմին մեղադրանք էր առաջադրվել տուժողի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:

Գործով տուժողը Գերասիմի կինն է: Նրանց ընտանիքում երեք անչափահաս երեխա է մեծանում:

Նույն՝ 112 հոդվածի 1-ին մասով Գերասիմը մեկ անգամ արդեն՝ 2013 թվականին, դատապարտվել է, ազատություն է դուրս եկել 2015 թվականին՝ պատիժն ամբողջությամբ կրած:

Ըստ ներկա մեղադրանքի՝ 2017 թվականի ապրիլի 12-ին, առավոտյան ժամը 8-ին Գերասիմը Նոր Խարբերդում գտնվող իրենց տանը վիճել է կնոջ հետ, վիճաբանության ընթացքում մեկ անգամ աջ բռունցքով հարվածել է կնոջ որովայնի ձախ հատվածին՝ վերջինիս առողջությանը՝ որովայնի փակ, բութ վնասվածքի, փայծաղի պատռվածքի, հետորովայնամզային տարածության արյունազեղման ձևով պատճառել է ծանր վնաս:

Դատարանում Գերասիմն իրեն մեղավոր է ճանաչել: Նա հայտնել է, որ դեպքի օրվա առավոտյան կնոջն ասել է, թե ուզում է երեխային դպրոց տանել ու գնալ աշխատանքի:

Կինը պատասխանել է, թե երեխային ինքը կտանի դպրոց, իսկ Գերասիմը թող մնա տանն ու նորոգման գործերն անի:

Ամուսինները վիճել են երեխային դպրոց տանելու և տան նորոգման հարցերով:

Գերասիմը կանգնած դիրքից մեկ անգամ բռունցքով հարվածել է բազմոցին նստած կնոջ որովայնի ձախ մասին:

Հարվածի ժամանակ հյուրասենյակում են եղել նաև Գերասիմի մայրն ու անչափահաս դուստրը: Նրանք միջամտել են, Գերասիմը երեխային տարել է դպրոց ու տուն է վերադարձել՝ աշխատանքային շորերը վերցնելու և աշխատանքի գնալու՝ նա մասնավոր ներկարարական աշխատանքներ է կատարել:

Բայց տանը Գերասիմը տեսել է, որ կնոջ ինքնազգացողությունը վատացել է: Նա դստերն ասել է, որ շտապօգնություն զանգի:

Կնոջը շտապօգնության մեքենայով տեղափոխել են հիվանդանոց ու վիրահատել են: Պարզվել է՝ կնոջ փայծաղը պատռվել է:

Գերասիմն ասել է, թե զղջում է, կնոջ հետ արդեն հաշտվել է, խնդրել է իր նկատմամբ մեղմ վարվել:

Տուժող կինը հայտնել է, որ ամուսնու հարվածից հետո իր ինքնազգացողությունը վատացել է, ինքը մտածել է՝ ցավերը ստամոքսի խոցի պատճառով են: Բայց ցավերը գնալով ուժեղացել են: Երբ հիվանդանոց են տարել, ինքը ստել է, թե վնասվածքը ստացել է ընկնելու հետևանքով:

Տուժողը հայտնել է, թե հաշտվել է ամուսնու հետ, ներել է նրան: Նա խնդրել է մեղմ վարվել ամուսնու հետ, քանի որ նա է իրենց ընտանիքի միակ կերակրողը:

Դատարանը հաստատված է գնահատել ամբաստանյալին մեղսագրված արարքը, հաշվի է առել, որ Գերասիմի խնամքին են երեք անչափահաս երեխաները, որոնցից երկուսը մինչև 14 տարեկան են՝ 7 տարեկան որդին ու 2 տարեկան թոռը: Գերասիմի ավագ դուստրը… 16 տարեկան է:

Գերասիմի խնամքին են նաև վատառողջ կինը, թոշակառու ծնողները, վերջիններիս թոշակների հանրագումարը կազմում է 37 հազար դրամ…

Դատարանն արձանագրել է, որ դատաքննության ընթացքում հիվանդանոցում են հայտնվել Գերասիմի 16-ամյա դուստրն ու 68-ամյա մայրը՝ առաջինը՝ երիկամային ծանր հիվանդությամբ, երկրորդը՝ ուղեղի արյան շրջանառության սուր խանգարումով…

Դատարանը հաշվի է առել, որ հանցավոր արարքի կատարումից հետո Գերասիմը միջոցներ է ձեռնարկել կնոջ բժշկական օգնությունը կազմակերպելու համար՝ աղջկան հանձնարարել է զանգել շտապօգնություն, կնոջն ուղեկցել է հիվանդանոց, հոգացել է բուժօգնության հետ կապված ծախսերը: Նա տվել է խոստովանական ցուցմունքներ:

Դատարանն արձանագրել է նաև հանցագործության կատարման վտանգավոր ռեցիդիվ՝ Գերասիմ Մ.-ի կողմից՝ նա մեկ անգամ արդեն՝ 2013 թվականին, կատարել էր համասեռ հանցավոր արարք, որի համար դատապարվել ու պատիժ է կրել: Օրենքով, այս անգամ Գերասիմ Մ.-ի պատիժը չի կարող ավելի մեղմ լինել, քան 4 տարի 8 տարի ազատազրկումը:

Դատարանն արձանագրել է, որ այդպիսի պատժի նշանակումը «բացասական ազդեցություն կունենա ամբաստանյալի ընտանիքի անդամների կյանքի պայմանների վրա… Տուժողը դատարանին հղած դիմումի մեջ բառացի գրել է. «Մեր աշխատող ուժը իմ ամուսինն է, խնդրում եմ մեղմ վերաբերվել մեր նկատմամբ»… Դատարանը չի կարող անտեսել նաև Գերասիմ Մ.-ի արարքում ռեցիդիվի առկայությունը…»:

Դատարանը ամբաստանյալին ազատել է դատական ծախսերի հատուցումից՝ «քանի որ կոնկրետ դեպքում դատաբժշկական փորձաքննության՝ 8 հազար դրամ արժեքի գանձումը ամբաստանյալից կարող է էապես ազդել նրա խնամքի տակ գտնվող անձանց նյութական վիճակի վրա»:

Դատարանը Գերասիմ Մ.-ին մեղավոր է ճանաչել տուժողի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով, և քրեական օրենսգրքի 64 հոդվածի կիրառմամբ նրա նկատմամբ նշանակել է տվյալ հոդվածի մասով նախատեսված նվազագույն պատժից ավելի մեղմ պատիժ՝ ազատազրկում՝ 2 տարի 6 ամիս ժամանակով: Պատժի սկիզբը՝ Գերասիմ Մ.-ին փաստացի կալանքի տակ առնելու պահից…