ԱՄՆ նախագահ Դոնալդ Թրամփի նախկին թիկնապահ Քեյթ Շիլլերը Կոնգրեսի Ներկայացուցիչների պալատի հետախուզության հարցերով կոմիտեի փակ նիստում ելույթի ժամանակ հայտնել է, որ Մոսկվայում 2013 թ. «Միսս Տիեզերք» մրցույթից առաջ բիզնես-հանդիպման ռուս մասնակիցներից մեկն առաջարկել է «5 կին ուղարկել» միլիարդատիրոց հյուրանոցային համար: Առաջարկն անմիջապես մերժվել է, մեջբերում է Շիլլերի խոսքերը NBC News-ը՝ հղում անելով կոմիտեի նիստին ներկա 3 զրուցակիցների:
Շիլլերի պնդմամբ՝ ինքը Թրամփին մարմնավաճառներ տրամադրելու առաջարկը որպես կատակ է ընդունել և պատասխանել է. «Մենք նման բանով չենք զբաղվում»: Աղբյուրների տեղեկությամբ՝ Շիլլերն այս պատմության մասին խոսել է՝ մեկնաբանելով պնդումները, որ Թրամփը Մոսկվայում 4 տարի առաջ օգտվել է մարմնավաճառների ծառայություններից:
Նախկին թիկնապահի խոսքով՝ այդ օրը, երբ Թրամփը վերադարձել է հյուրանոցի իր համար, ինքը տեղի ունեցածը պատմել է Թրամփին, իրենք երկուսով ծիծաղել են այդ գաղափարի վրա: Միևնույն ժամանակ, Շիլլերը նշել է, որ Թրամփի համարի մոտ ամբողջ գիշեր չի հերթապահել, ուստի չի կարող հաստատ իմանալ՝ հետո այնտեղ ինչ է տեղի ունեցել: Սակայն նա վստահություն է հայտնել, որ Թրամփը գիշերը մենակ է անցկացրել:
Թրամփի «ռուսական դոսյեի» սկանդալային նյութերը հրապարակվել են 2017 թ. սկզբին BuzzFeed կայքում: Թրամփն այդ տեղեկությունները բազմիցս շինծու է անվանել:
