«Իրավունքի և ազատության կենտրոնի» ղեկավար, ԽՍՀՄ օրոք քաղբանտարկյալ Վարդան Հարությունյանը մամուլի ասուլիսի ժամանակ նշեց, որ իշխանությունները կանխամտածված են տարածում այն լուրերը, թե «Հայկական ժամանակ» օրաթերթի գլխավոր խմբագիր, քաղբանտարկյալ Նիկոլ Փաշինյանը հակասություններ ունի քրեական աշխարհի հետ: Ըստ իրավապաշտպանի` այդ լուրերը տարածում են այն նպատակով, որ, եթե, Աստված չանի, Նիկոլի հետ մի բան պատահի, իշխանությունները հայտարարեն, որ նա խնդիրներ է ունեցել իր խցի կալանավորների հետ: «Եվ մի քիչ էլ խելքը կորցրել է»,- հավելեց Մեսրոպ Մովսեսյանը: Վարդան Հարությունյանը նշեց, որ Նիկոլ Փաշինյանի հետ նույն խցում իրենց պատիժը կրող տասնութ բանտարկյալները հանցագործներ են: Նա նշեց, որ այդ բանտարկյալներին հարցաքննելու դեպքում էլ նրանք ասում են այն, ինչը պահանջում են «Կոշ» ՔԿՀ-ի աշխատակիցները: Ի պաշտպանություն Նիկոլ Փաշինյանի մամուլի ասուլիս հրավիրածները տեղեկացրին, որ երեկվանից Նիկոլ Փաշինյանին մեկուսացրել են «Կոշ» ՔԿՀ-ում, նրան պահում են մեկուսարանում: Տիգրան Տեր-Եսայանը նշեց, որ իշխանությունները հետևություն չարեցին նույնիսկ մարտիմեկյան դեպքերից հետո: Եվ, ըստ իրավապաշտպանի, իշխանություններին թվում է, թե որքան շատ գիշերային այցելություններ լինեն Նիկոլ Փաշինյանի խուց, այնքան իրենց պատիվը կբարձրանա: Տիգրան Տեր-Եսայանը նկատեց, որ Նիկոլ Փաշինյանի վրա հարձակումը եղել է գիշերվա ժամը 3-ին, իսկ արդեն լուսաբացին նրա խցի տասնութ կալանավորները հայտարարել են, որ իրենք նման բան չեն տեսել: Նա տարօրինակ է համարում, որ մինչև լուսաբաց քննչական մարմինները հասցրել են հարցաքննել տասնութ մարդու: Վարդան Հարությունյանը նշեց, որ իրենք մամուլի ասուլիսին հրավիրել էին նաև արդարադատության նախարարության ներկայացուցչին, որը չէր ներկայացել:
